Saksi pagpatay kang Blanco nahadlok

CEBU, Philippines — Nanawagan ang kapolisan nga motumaw ug mobarug isip saksi ang duha ka empleyado sa munisipyo sa Lungsod sa Ronda kinsa duty atol sa pagpatay sa ilang mayor nga si Mariano Blanco III.

Butyag sa hepe sa Cebu Provincial Police Office, Senior Supt. Manuel Javier Abrugena, nga nakadawat sila og impormasyon nga nahadlok sa ilang seguridad ang duha maong nagtago-tago na karon.

Nunot niini, niluwat og direktiba si Abrugena ngadto sa bag-ong hepe sa kapolisan sa Ronda nga si Police Inspector Renato Albuera nga hatagan og proteksyon ang maong mga saksi.

"Very important ang presence nila dahil without them, mahihirapan po tayo to pinpoint at malaman o ma-determine kung ano talaga ang nangyari during the incident," si Abrugena nagkanayon.

Nasayran nga ang maong mga saksi kinsa mga job order nga mga empleyado sa munisipyo maoy diha niadtong tungora ug giingong gitionan sila ug gipahupo sa upat ka armadong lalaki samtang nadunggan nila ang sunod-sunod nga boto gikan sa taas nga nahimutangan sa buhatan sa mayor.

Sa pagkakaron kasamtangang nangalap og dugang mga saksi ang kapolisan.

Dugang pa ni Abrugena nga hangtud karon, mga persons of interest pa lang ang anaa sa ilang listahan ug dili pa gyud kini matumbok nga suspek sa krimen. (BANAT NEWS)