16-anyos labing bata nga migradwar sa SuGod

CEBU, Philippines — Laing 29 ka mga recovering addict ang migradwar kagahapon sa Surrender Program sa Archdiocese of Cebu ug Love of God Community nga gidumala ni Fe Barino, kinsa mao usab ang chairman sa commission on the laity.

Tulo sa mga recovering addict ang menor de edad nga nagpangidaron og 16-anyos. Usa kanila ang mitug-an nga tungod sa curiousity ug tilaw-tilaw sa ilegal nga drugas maoy hinungdan nga siya naulipon niini .

Sumala sa maong batan-on nga sa wala pa siya masulod sa SuGod, maglisod siya kay kanunay siyang magalgal sa iyang mga barkada, hinungdan nga mapasalamaton siya nga adunay miawhag kaniya sa maong programa.

Alang niya nga grasya gikan sa Dios nga siya mi-graduate niini ug wala na makagamit og ginadiling drugas ingon man matintal sa paggamit niini.

Tinguha karon sa maong batan-on nga mobalik sa pagtungha ug maningkamot nga makapadayon sa tarong nga kinabuhi.

Emosyonal ang inahan sa maong menor de edad atol sa graduation sa nagbinugtong niyang anak nga natintal sa dili maayong barkada.

Siya nanghinaut nga hingpit na gyud nga mag-usab ang iyang anak ug dili na magpatintal bisan paman sa sitwasyon sa ilang lugar nga gipuy-an nga aduna gyuy problema sa ginadiling drugas.

Giawhag ni Fr. Ramon Ofredo, Spiritual Director sa SuGod, ang mga recovering addict nga bisan sa mga pagsulay sa ilang kinabuhi, magpasalamat gihapon sila kay ang Ginoo dili mobiya kanila basta mo-surrender lang sa ilang mga kasaypanan.

Samtang si Cebu Archbishop Jose Palma mapasalamaton sa maong programa sa pagtabang sa kabag-ohan sa mga nalambigit sa ilegal nga drugas nga maoy sinugdanan sa mga krimen.( /DILT)(BANATNEWS)