Kapin P1.5 milyong shabu nasakmit

CEBU, Philippines – Gibana-bana nga mokabat sa P1.5 milyones ang balor sa shabu nga nasakmit sa managlahing buy-bust operation sa Siyudad sa Sugbo sulod sa 24-oras.

Mokabat sa usa ka milyon ka pesos ang kantidad sa gituohang shabu ang nasakmit kagahapon sa udto sa Sitio Kahuyan, Alaska, Mambaling.

Ang operasyon gipahigayon sa Special Operations Unit 5, Philippine National Police-Drug Enforcement Group nga gipangulohan ni Supt. Glenn Mayam, Cebu City Police Office Drug Enforcement Unit nga gipangulohan ni Chief Inspector Jackyll Bilibli ug adunay koordinasyon sa Philippine Drug Enforcement Agency 7.

Nadakpan ang suspek nga si Arnold Lupo, 28, nagpuyo sa nahisgutang lugar, kinsa nakuhaan og upat ka medium nga pakete sa shabu ug P280,000 nga bodol buy-bust money.

Samtang sa Sitio Ponce, Barangay Caretta, nasakmit sa kapolisan ang gibana-bana P354,000 nga kantidad sa shabu kagahapon sa buntag nga gipasiugdahan gihapon sa samang grupo.

Ang nasikop mao si Rolly Laborte, 29, nagpuyo sa nahisgutang lugar, kinsa nakuhaan og usa ka medium nga pakete ug 12 ka gagmay’ng pakete sa gituohang shabu ug giingong sakop sa big-time illegal drug group sa siyudad.

Sa laing bahin duha sab ang nadakpan duol sa usa ka unibersidad sa Barangay Talamban kagahapon.

Ang mga suspek mao sila si Michael Erana, 36, taga Purok 5, ug si Francisco Lascuna, 34, taga Purok 4, sakop sa Barangay San Jose, Cebu City, kinsa nakuhaan og lima ka  pakete sa gituohang shabu nga gibana-bana nga moabot sa P17,700.

Samtang sa Hillside, Talamban gihapon, nadakpan sa sakop sa Police Station 8 ang usa ka Shirnov Surban, 42, kagahapon sa alas 2 sa buntag, kinsa nakuhaan og tulo ka pakete sa gituohang shabu nga gibana-bana nga P6,726 ang kantidad.

Sa Sitio Acacia, Barangay Lorega San Miguel nadakpan kagahapon si Bernard Dorero, 33, kinsa nakuhaan og 11 ka pakete sa gituohang shabu nga gibana-bana nga P5,000 ang kantidad.

OTBT Operation

Samtang sa nagpadayon nga One Time Bigtime Operation sa kapolisan nasikop ang 15 ka pushers sa Lungsod sa Cordova, Dakbayan sa Lapu-Lapu, Lungsod sa Liloan ug Carmen sa managlahing buy-bust operation.

Si Senior Inspector Efren Diaz Jr., hepe sa Cordova Police Station, niingon nga ang buy-bust operation ilang gipahigayon sa Purok Nangka, Barangay Day-sa diin nadakpan sila si Ardian Ventura Arbelon, 39; Juanito Elmundo Demape, 37, ug Jirlyn Bentulan, 23, nga taga Panagdait, Ibabao sa mao gihapong lungsod.

Nasakmit gikan sa mga dinakpan ang 11 ka gagmay nga pakete sa shabu, P300 nga marked money ug laing P300 nga gituohang halin.

Laing nadakpan giila ni Senior Inspector Alden Zambrano sa City Intelligence Branch (CIB) sa Lapu-Lapu City Police Office nga sila si Guillermo Bayalas Albios, 57, taga Seawage, Pusok, kinsa nakuhaan og napulo ka gagmay nga pakete sa shabu.

Si Senior Inspector Diosdado Malazarte sa Presinto 3 sa LLCPO niila sab sa lain nilang nadakpan nga si Paulo Tayo Patalinjug, 29, taga Purok Balanghoy, Pajo sa maong dakbayan kinsa nasakmitan og 23 ka gagmay nga pakete sa shabu, P1,500 nga buy-bust money ug P300 nga gituohang halin.

Samtang si Senior Police Officer 1 Jayson Gayo sa Liloan Police Station niila usab sa ilang nadakpan alas 5 pasado kagahapon sa buntag sa Barangay Sta. Cruz nga si Ruam Maglasang, 36, nagpuyo sa maong dapit.

Nakuha gikan sa dinakpan ang lima ka pakete sa shabu ug armas nga kalibre .357 uban sa mga bala.

Sa Cogon West, Lungsod sa Carmen maoy nangulo sa buy-bust operation ang hepe nga si Senior Inspector Ramil Morpos kinsa niila sa nadakpan nga sila si Jilner Into, Naciancino Bonjoc ug Guillermo Villarba, pulos hingkod nga taga Barangay Dawis sa nahisgutang lungsod.

Si Morpos niingon nga nakaeskapo ang ilang target sa buy-bust nga si Julito Davidon Jr. apan pasakaan gihapon kini og kaso base sa mga ebidensiya nga ilang nasakmit. (Romeo T. Limpangog ug Rowena D. Capistrano/GMR)(BANAT NEWS)