Mega Cebu mopasiugda og investigative report competition

CEBU, Philippines — Ilambigit na ang media sa pagsaulog sa Mega Cebu Month sunod buwan nga pasiugdahan sa Metro Cebu Development and Coordinating Board (MCDCB) ug Ramon Aboitiz Foundation Inc. (RAFI).

Kini pinaagi sa ilang gilusad nga investigative report competition nga salmutan sa mga sakop sa media sa Sugbo sama sa print, online ug broadcast.

Matud pa ni Caroline Ballesteros, communications and stakeholder relationship manager sa Mega Cebu, nga pagdasig kini sa media nga aktibong mosalmot sa Mega Cebu Month.

"For the past 5 years, murag wala maapil ang media gyud sa engagement activity for Mega Cebu. So this year, we are holding investigative report competition alang sa media," matud ni Ballesteros.

Ang mga moapil kinahanglang mopresentar og usa ka estorya o single-subject series nga labot sa mga nag-unang isyu sa Metro Cebu sama sa trapiko, baha, septage, basura ug supply sa tubig.

Ang unang ganti makadawat og P15,000, ikaduha P12,000 ug P10,000 sa ikatulo ug plake sa matag mananaug. Ang mga entry kinahanglan namantala ug nasibya sugod sa Agosto 15, 2018 hangtud sa Septiyembre 29, 2018. Katapusang adlaw sa pagdawat sa mga entry unya sa Septiyembre 30, 2018. - Nova Jane A. Yanson (BANAT NEWS)