‘Salamat Padre’ malampuson

CEBU, Philippines — Malipayon ug mahinangpon ang kaparian atol sa gipahigayon nga Salamat Padre Celebration nga gipasiugdahan sa mga layko tibuok adlaw kagahapon.

Sa Archdiocesan Shrine of Santa Ana sa Lungsod sa Barili alas 6 sa buntag gipahigayon ang Santos nga Misa nga gidumala sa Team Moderator nga si Fr. Constantino “Jun” Navales uban nila ni Fr. Miguelito “Pads Do” Sarmago, Fr. Glad Niere ug Fr. Ruben Bajenting.

Matud ni Niere atol sa iyang wali nga mapasalamaton sila sa pagpasidungog nga gihatag kanila bisan dili sila haum kay sama ra usab sila sa mga tawo apan sila mga gasa lang sa Ginoo aron pagsangyaw sa Maayong Balita sa kaluwasan.

Awhag ni Niere sa katawhan nga iampo usab silang kaparian kay aduna usab silay mga kahuyangan ilabi na kadtong mga nag-atubang og mga pagsuway.

Human sa Santos nga Misa gisunod ang pag-apod-apod sa gasa ngadto sa kaparian nga gisundan sa panagsalo sa pamahaw.

Samtang sa Sto. Tomas De Villanueva sa Talaga, Argao gipaambit usab ni Fr. Eric Jecong nga mapasalamaton siya sa gihimo sa mga layko ug nipadayag nga dili usab lalim ug sayon ang trabaho sa kaparian apan ilaha kining gigakos tungod sa ilang tawag sa pagpangalagad.

Human sa Santos nga Misa gisunod ni Econg ang healing of the sick and prayer ngadto sa mga nanimba nga gisundan sa paniudto ug programa nga giandam sa mga layko.

Ang selebrasyon subay sa kapistahan ni St. John Mary Vianney.

Ang chairman sa Commission on the Laity nga si Fe Barino mapasalamaton ug mahinangpon sa kalampusan sa kalihukan.

Si Cebu Archbishop Jose Palma maoy nangulo sa Salamat Padre Celebration sa Cebu Metropolitan Cathedral.

Samtang karong Martes, 13 ka deakono ang ordinahan sa pagkapari nga naglangkub nilang Rev. Ignatius Arsolon, SAP; Rev. Evaristus Asadu, Rev. Alden John Baran, Rev. Gabriel Belino, Rev. Martin Belongilot, Rev. Mel John Coraraton, Rev. Arnel Dionaldo, Rev. Richfiels Vincent Hernando, Rev. Francis Manugas, Rev. Jerald Pinay, Rev. Nicolas Ramos, Rev. Jeffmonray Romarate, Rev. Eddie Boy Vega.

Alas 9 sa buntag ipahigayon ang misa sa Ordination to the Sacred Order of Presbyters nga dumalahon ni Archbishop Palma. (BANAT NEWS)