Langyaw nanunggab og laing langyaw

CEBU, Philippines — Usa ka 28-anyos nga langyaw ang gisikop sa kapulisan human kini nanunggab og laing langyaw ug usa ka menor-de edad diha sa Barangay Colase lungsod sa Samboan niadtong Biyernes sa gabii.

Ang suspetsado giila nga si Frederick Martin Smith, lumad nga taga Georgia, USA. Ang iyang gidunggab giila nga si Uldez Lingeberzins, 83, nga usa ka Australian  ug tag-iya sa pension house diin buot mo-check in sa suspek.

Si Police Officer 1 Cesar Catubig sa Samboan Police mitug-an nga si Smith niadto sa pension house para motan-aw kay plano niini nga mobalhin.

Ang suspek diha magpuyo sa laing resort atbang ra gihapon sa maong pension house.

Matud pa nga dihang gipakita ni Lingeberzins ang usa ka lawak kuyog ang helper niini nga usa ka 15 anyos nangita og hot and cold nga tubig ang suspetsado hinungdan nga gidala kini sa tag-iya sa nahimutangan sa CR.

Apan pag-abot didto sa walay igong rason kalit nga gituok sa suspek si Lingeberzins ug wala pa gyud matagbaw gidunggab niini ang baba ug ubol-ubol sa biktima.

Ang menor de edad nga helper nga nakakita sa panghitabo daling midagan gawas sa lawak aron mangayo og tabang apan gigukod kini sa suspetsado ug gidunggab onse ka mga higayon sa lain-laing bahin sa iyang lawas.

Ang langyaw nga biktima nisuway og dagan apan gigukod usab sa suspek ug giusban pagdunggab.

Ang menor de edad nga biktima bisan sa iyang mga samad nakahigayon sa pag-ikyas ug nakapangayo og tabang sa mga kaubang trabahante hinungdan nga nakatawag sila og polis.

Nakuha gikan sa mga kamot sa suspetsado ang tulo ka pulgada nga kutsilyo.

Dali usab nga gidala sa tambalanan ang duha ka biktima ug anaa na karon sa luwas nga kahimtang.

Si Lingeberzins mitug-an sa kapulisan nga kadtong higayona ra sila nagkakita sa suspetsado ug wala siya masayod kon nganong gidunggab siya niini.

Si Catubig miingon nga nakig-alayon na sila sa US Embassy aron pagtino sa background niini tungod kay nibuhi kini og estorya sa kapulisan nga adunay nagsugo kaniya nga patyon si Lingeberzins.

"Nagpadayon pa gyud ang among imbestigasyon kay atong gitan-aw ang iyang background didto sa iyang gigikanan," matud ni Catubig. (/IBM)(BANATNEWS)