Mga sikyu gipaboran sa DOLE

CEBU, Philippines – Nakadawat og P3.4 milyones ang 104 ka security guards isip workers award human ang Department of Labor and Employment nipagawas og compliance order sa kompaniya niini nga mobayad sa wage differential, uniform allowance ug overtime pay sa mga apektadong trabahante.

Ang kamanduan gikonpirmar ni DOLE-7 director, Atty. Alvin Villamor, human ang mga security guards nipadangat sa ilang reklamo hinungdan nipahigayon sila og complaint inspection sa Vulcan Security Agency nga anaa nahimutang sa usa ka kompaniya sa semento sa Dakbayan sa Naga.

Ang DOLE nipagawas og compliance order niadtong Abril 14, 2018 diin nag-awhag kini sa kompaniya sa mga security guards nga bayran sa sakto ang mga trabahante.

Ang madawat sa mga security guards nagsugod gikan sa P7,000 ngadto sa P55,000 alang sa ilang wage differential, overtime pay ug uniform allowance.

Usa sa mga security guards, Jimmer Delfino, kinsa nagtrabaho sulod sa 11 ka  tuig, mapasalamaton nga nahatagan og pagtagad ang ilang problema ug daku sab og tabang ang nadawat nila nga kwarta alang sa ilang panginabuhian.

Si Major Eddie Casas, project manager sa Vulcan Security Agency, nipasalig nga walay pagpahunong sa duty sa 104 ka hingtungdang security guards kay empleyado gihapon sila sa ahensya. (/GMR)(BANAT NEWS)