Kapitan mabatid miesplikar sa iyang habig

CEBU, Philippines — Midepensa sa iyahang kaugalingon ang kapitan sa Barangay Mabolo Niña Mabatid labot sa kontrobersiya nga gikalambigitan niini kalabot sa duha ka mga trabahante sa usa ka iladong hotel diha sa Barangay Lahug.

Kahinumduman nga si Mabatid gikiha ni Welbert Pepito og grave misconduct; conduct unbecoming of a public officer; ug code of conduct and ethical standards for public officials and employees kay nainsulto kini sa gihimo sa kapitan ug kauban niini nga si Dr. Ramon Floresta nga usa ka iladong magpapatigayon sa Mindanao.

Gipasanginlan ang duha nga nanghasi diha sa maong hotel niadtong Hunyo 19 ug matud pa nakainom ang nahisgutang kapitan. Sa gipatawag niining press conference miangkon siya ang naa sa video nga nag-viral karon sa social media ug tinuod nga nasuko siya nianang higayona.

Apan matud niya wala gipakita sa video ang sinugdanan sa hitabo nga mao nga naalaan siya sa guwardiya nga ‘escort.’  Pag-abot niya sa elevator  laing guwardiya na usab ang niduol ug mipa-logbook kaniya kay naalaan gihapon siya nga ‘escort.’

“Yes, I pointed fingers at him, Why? I was emphasizing something I think that’s a normal reaction ang uban siguro gani dili ingon ana ang reaction ang uban siguro diretso panumbag. Ang uban managpa, kato gani akong actuation didto, dili gani to makaingon ko nga grabe because I was still controlling my temper,” asoy ni Mabatid. Matud niya iyang katungod isip guest ug isip usa ka babaye ang iyang pagpanalipod sa kaugalingon kay gihukman dayon siya tungod sa iyang dagway.Sumala pa niya nauwawan siya sa gihimo kaniya kay dili siya ‘escort’ apan wala paminawa iyang mga gipanulti bisan og regular guests na sila sa maong hotel.

 “I explained myself many times makita man ninyo, I was emphasizing, kita man mo. I was pointing fingers but it does not mean nga katong akong pagtudlo-tudlo namalikas ko. Katong atong pagtudlo-tudlo it does not mean nag-mura (namalikas) ko’g tao kay kung naa lang nay audio… all I was saying was I am not a whore, I am a regular guest here,” matud pa ni Mabatid.

Si Mabatid nasakitan nga nigawas ang video kay isip hotel guest duna sila’y right to privacy.

Gipasaylo na unta ni Mabatid ang maong guwardiya human kini nangayo og pasaylo kaniya. Adunay video footage si Mabatid sa pagpangayo og pasaylo sa guwardiya diha kaniya nga iyahang gipakita sa mga sakop sa media kagahapon.

Si Atty. Delon Orot, abogado ni Mabatid miingon nga ilaha na karong gitun-an ang kasong ipasaka batok sa mga nagpakauwaw sa kapitan.

Ang kapitan miangkon usab nga may relasyon sila ni Dr. Floresta mao nga nagkuyog sila sa maong hotel.

“I have to be frank and honest to everyone that we are a couple. Now I don’t know if I have the right to call him as a husband because we did not get married here in the Philippines but the fact remains that we are in a relations if tawgon nimo og common law partner yes, he is my common law partner,” matud pa sa kapitan.

Dako ang pagtuo ni Mabatid nga adunay bulok politika ang nahitabo kaniya kay sa pagdagan pa lang niya pagka-kapitan daghang black propaganda batok niya.

Hasta ang report nga modagan siya pagka presidente sa ABC giingong gihimong Barangay Mayor’s Office ang Mabolo Barangay Hall ug gikuhaan sab siya og sakyanan. Mas gusto ni Cebu City Mayor Tomas Osmeña si Kapitan Franklyn Ong. Si Mabatid miingon nga wala niya mabati nga sakop siya sa partido sa mayor.

 “I’m one person who’s not plastic I cannot hide my emotions so wa sa gyud ko moadto didto nga mo take oath. But I could have done it. But giunhan ko niya nga pahawaon ko niya sa BOPK tungod lang aning hugon-hugon nga modagan ko for ABC Presidency, it’s not my fault.  It’s the Office of the President asking me to run for ABC Presidency. I even asked permission from him I thought malipay siya kay BOPK ang gipili nga modagan for ABC but di man diay. I was wrong because he already has a candidate which I respect so it could be political. I really do not know, but whatever it is murag kuwang na lang ba nga mosulti ko ba hubo-i na lang ko tanan. What’s next? akong negosyo, ipasira niya? It can happen, okay fine kung buhaton na niya I’m okay with it anyway gikan man ko sa ka-pobre,” matud ni Mabatid.

Si Cebu City Mayor Tomas Osmeña mitubag sa pagduda ni Mabatid nga ‘politically motivated’ ang nahitabo kaniya.

“How is her drunkenness politically motivated? That’s my question, I’ve been mayor since 30 years ago I’ve never seen government official behave like this. She’s a disgrace to the Barangay Captains, she’s a disgrace to women, very bad example,” asoy ni Osmeña.

Gihimakak usab niya nga gibawian si Mabatid og sakyanan. (IBM) (BANAT NEWS)