Police escort sa mga mayor ilisan ra
CEBU, Philippines — Giklaro ni Police Regional Office-7 director, Chief Supt. Debold Sinas, nga wala kuhai og police security ang mga mayor apan ilisan kadtong mga Police Officer 1 og mas taas nga ranggo.
Si Sinas nagkanayon nga gihatagan nila og usa ka buwan ang mga mayor aron pormal nga mangayo og security gikan sa Police Security Protection Group (PSPG) usa pa kuhaon ang kasamtangan nga mga PO1 nga polis.
Kini human niluwat og direktiba ang Kampo Crame nga hingusgan pagbalik ang dugay na nga pagdili sa mga PO1 isip police security.
Gikatahong nangreklamo ang pipila ka mayor human giingong kuhaan sa mga police security tungod sa kahadlok sa ilang kinabuhi nunot sa sunod-sunod nga patay sa mga mayor, bise mayor ug uban pang opisyal sa nasud.
Gipasalig ni Sinas nga kasamtangang gi-monitor sa Regional Intelligence Division kun aduna bay mga hulga sa kinabuhi ang mga mayor ug ubang opisyal sa rehiyon.
"Wala (tuyoa ang pagpailis og polis), it so happen lang. Wala may target nga mayor," si Sinas nagkanayon.
Si Bokal Sun Shimura nagtinguha nga makigtagbo kang Sinas aron nga mohangyo nga ibalik ang police escort sa iyang ama-ama nga si Daanbantayan Mayor Vicente Loot.
Si Shimura kinsa maoy chairman sa committee on peace and order sa Provincial Board nagkanayon nga ang pagkuha sa police security dakung kabalaka ilabi na ni Loot human suwayi sa pagbanhig ang tibuok nilang pamilya usa ka adlaw dayon sa eleksiyon sa Barangay ug Sangguniang Kabataan niadtong Mayo 14.
Matud ni Shimura nga posibleng pahimuslan kini sa uban nga adunay tinguhang dautan sa mayor.
"Hopefully malooy pud tawon atong kadagkuan sa PNP kay sila pud naay pamilya," matud ni Shimura.
Dugang ni Shimura nga dunay pagduha-duha karon ang ilang pamilya kun modagan ba pagbalik sa pagka-mayor si Loot tungod sa mga hulga karon sa seguridad. (BANAT NEWS)
- Latest