Ex-CAFGU ang suspek pagpatay sa mayor

CEBU, Philippines — Gipasakaan na og kasong murder ang usa sa mga mamumuno nga mipusil patay kang Buenavista Mayor  Ronald Tirol kinsa mao sab ang gitumbok nga misuway pagpusil sa maong mayor niadtong tuig 2014 sulod sa buwangan sa Clarin, Bohol.

Giila sa hepe sa Buenavista Police station nga si Chief Insp. Rully Lauron ang maong suspetsado nga si Elmer Melencion, kanhi sakop sa CAFGU (Citizen Armed Force Geographical Unit), nga giingong notadong hitman.

Gipasakaan si Melencion og kasong murder kagahapon human giingong namay-ongan kini nga maoy mipusil kang Tirol niadtong Domingo sa hapon sulod sa buwangan didto sa barangay Asinan, lungsod sa Buenavista, Bohol.

Matud pa ni Lauron sa Banat News si Melencion maoy mipusil ni Tirol niadtong tuig 2014 sa Clarin apan napakyas kini. Si Tirol nangayo og police escort ug adunay private security tungod niini.

Si Lauron midugang nga miundang isip CAFGU si Melencion ug nahimong hitman ug aduna kini duha ka warrant of arrest sa kasong murder.

Gisubay pa sa kapolisan kon kinsa pa ang duha ka kauban niini. Away sa negosyo, personal, ug bangi sa politika ang gitan-aw nga motibo sa maong krimen. (BANAT NEWS)