Gitigbas sa anak sa kainom
CEBU, Philippines – Gitigbas ang usa ka lalaki human gikalalis ang amahan sa suspek samtang nag-inom niadtong Biyernes sa alas 9:40 sa gabii sa Barangay Nangka, Consolacion.
Ang biktima mao si Placedo Macapagong Niñal, 49, samtang ang suspek giila nga si Jemar Larosa Basarte, 19-anyos.
Matud ni PO3 Adrian Cagalitan nga samtang nag-inom kuyog sa lain pang mga barkada nahitabo ang panaglalis hinungdan nga niuli ang amahan ni Basarte apan giingong gisulong kini sa biktima sa ilang panimalay.
Apan nikuha og sundang si Basarte ug gitigbas ang wala nga parte sa buko-buko ni Niñal.
Ang tulo ka barangay tanod sa lugar atol sa hitabo ang dali nga nitawag sa kapolisan.
Daling gidala si Niñal sa Vicento Sotto Memorial Medical Center aron sa pagpatambal sa naangkong samad.
Nisibat unta pahilayo sa maong dapit ang suspek apan ang kapolisan sa maong lungsod nga nakadawat sa alarma ang dali sab nga naghimo og follow-up operation nga maoy hinungdan sa iyang pagkasikop.
Kasong frustrated murder ang giandam sa kapolisan nga ipasaka batok sa suspek kinsa nagtingkagol na karon sa detention cell sa Consolacion Police Station. (Romeo T. Limpangog/GMR)(BANAT NEWS)
- Latest
