12 nadakpan sa managlahi nga buy-bust
CEBU, Philippines — Nadakpan ang duha ka lalaki kinsa nakuhaan og 30 gramos nga shabu nga gibana-bana nga mobalor og P354,000 atol sa anti-illegal drug operation sa kapolisan sa IT Park, Apas, Siyudad sa Sugbo kagahapon sa kaadlawon.
Giila ang mga suspek nga sila si Pepe Parame, 34, taga Sitio City Central, Barangay Luz, ug Lief Jill Colegado, 35, taga Nasipit, Talamban, Siyudad sa Sugbo. Ang mga dinakpan temporaryo nga gipriso sa Cebu City Police Office samtang pasakaan pa og tukmang kaso.
Samtang lima ka tawo kinsa upat ang lalaki ug usa ang babaye ang nadakpan sa buy-bust operation niadtong Huwebes sa tungang gabii sa Purok Bombshell, Babag, Dakbayan sa Lapu-Lapu.
Usa ka Mario Agusto alyas Mayang, 49, ang target sa kapolisan, kinsa nasakmitan og 17 ka gagmay nga pakete sa shabu nga balor og P8,296.
Kauban nga nadakpan si Jena Amoin, 33, taga Zone Lato, Brgy. Kalawisan, kinsa diha sa lugar atol sa buy-bust ug nakuhaan og usa ka gamay nga pakete sa shabu.
Samtang ang tulo ka lalaki nga nag-inom nga sila si Ariel Licayan, 37; Yolando Oyao, 57, ug Arje Berame, 30, ang gidakop human giingong nisuway pagpugong sa kapolisan nga dakpon ang ilang silingan.
Sa laing bahin duha ka suspek nga nalambigit sa drugas ang nadakpan kagahapon pasado alas 12 sa kaadlawon sa Sitio Nangka, Brgy. Luz, Dakbayan sa Sugbo. Giila ang mga suspek nga sila si Belinda Tampus, 55, ug Jonathan Cabañero, 20, kinsa nakuhaan og shabu nga balor og P72, 216.
Samtang nadakpan sab ang pusher sa dalan F. Ralota, Poblacion, Dakbayan sa Danao.
Ang nadakpan nailhan nga si Romeo Dinoy Calderon, 35, taga Barangay Tuburan Sur sa maong dakbayan, kinsa nakuhaan og lima ka gagmay nga pakete sa shabu.
Sa Sitio Lasang, Barangay Mactan, Dakbayan sa Lapu-Lapu maoy nadakpan ang duha ka pushers nga sila si Johnny Igot Labajo, 23, taga Sitio Pasil, Barangay Maribago, ug Geonico Taghoy nga nagpuyo sa maong dapit. Gawas sa shabu, nasakmit gikan sa mga dinakpan ang kalibre .38 nga armas nga may mga bala. (Mary Rose S. Sagarino ug Jomelyn B. Largado, CNU Interns ug Romeo T. limpangog/GMR)(BANATNEWS)
- Latest
