Visayas gitutukan sa adminitrasyong Duterte

CEBU, Philippines – Gitutukan sa administrasyon ni Presidente Rodrigo Duterte ang pagpalambo sa Visayas.

Matud ni Finance Undersecretary Bayani H. Agabin nga poverty rate sa Western, Central ug Eastern Visayas nilapas sa national average nga 21.6 porsiyento sa 2015.

Tumong sa presidente ang pagpakunhod sa gidaghanon sa kapobrehon ngadto lang sa 14 porsyento sa tuig 2022 ug ang labing kabus nga mga lalawigan sa Kabisay-an ang sentro niini.

Lakip sa mga flagship projects sa administrasyong Duterte sa Visayas nga aprobado na sa NEDA Board mao ang pagpalambo sa pasilidad sa Iloilo International Airport, New Airport sa Bohol, Bacolod Silay International Airport, ug pagtukod sa bag-ong Cebu International Container Port. Ang mga proyekto ubos sa "Build Build Build" sa gobiyerno gastuhan sa bahin sa makolekta sa reporma sa buhis ug pinaagi sa pinansyal nga suporta gikan sa mga "development partners" sama sa Asian Development Bank (ADB).

Ang kalihim sa ADB nga si Woochong Um niingon nga ang ADB moabag sa gobiyerno sa Pilipinas sa malungtaron ug inklusibo nga paglambo pinaagi sa pagtabang sa pagpauswag sa inprastaktura ug uban pa. Gipahigayon sa Sugbo niadtong Huwebes ang Philippine Economic Briefing (PEB) nga gitambungan sa mga negosyante ug uban pang stakeholders gikan sa Sugbo ug sa mga kasikbit nga lugar sa Visayas diin gituki ang development agenda sa administrasyong Duterte. Ang kalihukan sa PEB flagship kini sa Investor Relations Office (IRO) sa Bangko Sentral ng Pilipinas (BSP).

Sa PEB, ang mga senior nga opisyal gikan sa mga dagkong ahensya sa gobiyerno nipresentar sa mga inisyatibo aron sa pag-igo sa tumong nga 7 ngadto sa 8 porsyento nga tinuig nga pagtubo sa GDP hangtud sa 2022, ug pagkunhod sa poverty rate.

Si Budget Secretary Rolando U. Toledo niingon nga ang pagpatuman sa dagko nga proyekto sa transportasyon ug karsada gihimo nga posible pinaagi sa mga reporma sa budget diin sa P3.767-trilyon nga budget sa 2018, ang gobiyerno naggahin og P980.1-bilyon alang sa inprastraktura ug uban pang capital outlay. Pinaagi sa alokasyon sa sektor, ang social services gigahinan og P1.4-trilyon nga budget alang karong tuiga. (Niña Mae P. Salvacion, CNU Interns)(BANAT NEWS)