Sunog niulbo, bombero gireklamo
CEBU, Philippines — Niulbo ang usa ka sunog sa Barangay Cansojong, Dakbayan sa Talisay niadtong Lunes sa gabii.
Apan ang mga residente nagyawyaw kay walay naabot nga fire truck gikan sa Bureau of Fire and Protection (BFP) sa siyudad.
Giingong ang gamay nga fire truck sa Barangay Tangke ang naabot sa lugar ug maoy usa sa nakatabang sa pagpawong sa kayo.
Si SFO2 Rodulfo Luage, imbestigador sa kabomberohan sa dakbayan, nibutyag nga alas 7:50 nila nadawat ang alarma ug sulod lang sa 24-minutos napawong ang kayo.
Gibana-bana nga P15 mil lang ang danyos sa sunog sa usa ka kanhi shop nga gihimo na nga parkinganan.
Si Luage nipasabot nga dili tinuod ang pasangil nga walay fire truck nga naabot tungod kay duha ka fire trucks ang nakaresponde.
Siya nagkanayon nga ang gipasabot sa katawhan nga fire truck sa Barangay Tangke ila sa BFP.
Dugang ni Luage nga lisud sab sabton ang katawhan kinsa gusto nga diha-diha dayon matubag ang alarma samtang dunay higayon nga walay makapahibawo kanila ug deretso lang og reklamo. (GMR) (BANAT NEWS)
- Latest
