Duha nangalumos patay

CEBU, Philippines — Daghan karon ang gustong magpabugnaw tungod kay ting-init na ug ang usa sa paagi mao ang pagpangaligo sa mga resorts kauban ang pamilya, apan duha ka mga kinabuhi ang nakalas tungod sa pagkalumos samtang nangaligo sa dagat ug swimming pool sud sa nakalabay’ng duha ka adlaw.

Patay ang usa ka 3-anyos nga batang lalaki human giingong nalumos sa swimming pool sa usa ka resort sa may Barangay Tungkil, Lungsod sa Minglanilla kagahapon sa alas-9:30 sa buntag.

Ang nakalas naila nga si Lee Brent Cañoneo, taga Alaska, Barangay Mambaling, Dakbayan sa Sugbo.

Matud pa ni Senior Police Officer 2 Oliver Dacua, Desk officer sa Minglanilla Police Station, nidangop sa ilang buhatan ang paryente sa namatay ug nagpahibalo bahin sa nahitabo.

Giadto gilayon sa kapulisan ang Minglanilla District Hospital diin gidala ang bata ug matud pang Dacua gipahibalo sila sa mga doktor nga namatay kini.

Base sa imbestigasyon, ang inahan sa bata nga si Ramilyn Cañoneo  nanguyog sila sa outing sa ilang kaubang mga magtutudlo ug walay nakabantay nga niambak ang bata  sa swimming pool nga adunay giladmon nga upat ka tiil.

Matud pa nga walay life guard nga nagbantay ang maong resort ug ang gabantay usab sa cctv wala nag-monitor tungod kay base sa kuha sa cctv, nagkapa-kapa ang bata ug walay nakakita bisan ang mga kuyog niini.

Magpaabot ang kapulisan kung mopasaka og kaso ang mga ginikanan batok sa maong resort. Suway unta nga kuhaan sa Banat News og pamahayag ang maong resort apan dili kini makontak.

Sa laing bahin, patay na dihang napalgan ang 21 anyos nga babaye nga gituohang nakainom og ilimnong makahubog ug gituohang nalumos sa dagat sa barangay Poblacion, sa Santa Fe atol sa ilang family outing niadtong Domingo sa hapon.

Giila sa Santa Fe Police Station ang namatay mao si Joy Martus taga Barangay Guiwanon, Bantayan.

Sigun pa ni SPO1 Henry Asentista sa Banat News nangaligo ug nag-inom og ilimnong makahubog ang dalaga uban sa mga paryente ug taud-taod miadto kini sa dagat aron maligo apan nahibulong sila kay wa na mobalik.

Paglabay sa pipila ka minutos napalgan ang dalaga sa usa ka nilabay nga pumpboat nga naglutaw na sa dagat hinungdan nga gidagan kini didto sa baybayon.

Si Asentista miingong gisuwayan sa pag-Cardiopulmonary Resuscitation ang dalaga sa mga sakop sa Municipal Disaster Risk Reduction Management Office ug gidala sa Bantayan District Hospit apan human sa pipila ka higayong pagsuway og salbar kaniya gideklarar kining patay ni Dr. Lee Fua. (BANAT NEWS)