P4M vet clinic tukoron sa Tudela

CEBU, Philippines — Ang kagamhanan sa probinsiya sa Sugbo mogahin og P4milyones alang sa pagpatukod og veterinary clinic ngadto sa lungsod sa Tudela, isla sa Camotes.

Tumong niini nga ang mga tag-iya og hayopan sa maong lugar makapatambal sa ilang mga hayopan nga adunay sakit.

Si Dr. Mary Rose Vincoy, provincial veterinarian nagkanayon nga ang maong clinic alang sa tanang hayopan lakip ang mga large animal. Gibutyag ni Vincoy nga buot nilang ibutang ang clinic diha sa 3rd ug 5th class municipality ug napilian nila ang Tudela.

Gawas sa lungsod sa Tudela aduna pa’y usa nga ilang itukod sa habagatang bahin sa lalawigan apan wala pa gibutyag ni Vincoy kon asa nga lugar sanglit ila pa kining gi-finalize karon.

Si Vincoy nagkanayon nga ang maong vet clinic mohimo usab og regulatory function ug mo-isyu og certificate alang sa mga gusto nga ibyahe ang ilang mga hayop pagawas sa lalawigan sa Sugbo.  Ang plano sa maong clinic anaa na karon sa provincial engineering ug gipaabot nga masugdan og tukod karong tuiga. (BDB)  (BANAT NEWS)