BIN daku’g tabang sa komunidad

CEBU, Philippines - Gihingusgan ni Gobernador Hilario Davide III nga mabalik ang Barangay Intelligence Network (BIN) sa Lalawigan sa Sugbo aron makatabang kini sa otoridad ilabi na sa hulga sa terorismo.

Ang gobernador kinsa maoy chairman sa Regional Peace and Order Council sa Central Visayas (RPOC-7) mihimo sa maong kasiguruhan kang Interior and Local Government Undersecretary Austere Panadero kinsa nisugyot nga sugdan na og balik ang BIN sa matag barangay.

Sa nahitabong engkwentro sa Bohol, naobserbahan ni Panadero nga dakug tabang ang mga residente aron mahibaw-an kung asa nagtago ang mga miyembro sa Abu Sayyaf. Sama sa habal-habal driver nga nakahatag og impormasyon ngadto sa otoridad.

Gidayeg ni Davide si Bohol Governor Edgar Chato sa iyang maayong liderato ingon man ang mga sakop sa Armed Forces of the Philippines Central Command ug ang Police Regional Office-7 ilabi na sa mga sakop nila nga namatay atol sa engkwentro.

Subay niini, suportado nila ni Cebu City Mayor Tomas Osmeña ug Konsehal  Philip Zafra sa pagpabalik sa BIN sa dakbayan.

Alang sa mayor nga ang maong organisasyon magbunga og usa ka positibo nga epekto sa pagmentinar sa peace and order sa siyudad labaw na karong panahona nga nagpadayon ang hulga sa terorismo. Alang niya, kinahanglan manginlabot ang mga ordinaryong tawo sa pagsumpo niini.

Matud sa mayor nga ang kagubot anaa kanunay apan mas mohapsay ang lugar kun andam ug magbinantayon ang tanan sa palibot.

Alang usab ni Zafra nga ang pagbalik sa BIN, daku gyud og tabang sa paglikay sa kagubot ug sa pagbantay sa mga bandidong grupo nga gustong mosabwag og kasamok sa Sugbo. - Zeny L. Tapuyao ug Darlene A. Teves, CNU Interns/DILT) (BANAT NEWS)