Tulo gipamusil, usa patay
CEBU, Philippines - Tulo ka tawo ang gipamusil, usa kanila patay sa managlahing insidente sa pagpamusil dinhi sa Metro Cebu. Didto sa Sitio Sac 1, Barangay Buaya, Dakbayan sa Lapu-Lapu , usa ka Carlos Rasul,43, nga nagpuyo sa maong dapit ang gipusil.
Matud pa ni Police Officer 3 Marvin Saraum sa Homicide Section sa Lapu-Lapu City Police Office (LLCPO) gikan ang biktima sa gipatukod niyang gagmay nga panimalay nga iyang paabangan sa maong dapit. Dihang usa ka wala mailhing tawo ang misugat sa biktima ug gipusil kini ug daling misibat palayo.Patay na ang biktima pag-abot sa Lapu-Lapu City District Hospital.
Samtang nakaangkon og samad pinusilan sa iyang lawas ang usa ka Marissa Taradio Cabillo, 30, taga Alumnos- Mambaling dihang gipusil sa usa sa tulo ka mga lalaking nagmotor samtang kini naglakaw gikan sa balay sa amiga diha sa La Paloma Village.
Matud ni SPO2 Wetzel Berry, imbestigador sa Homicide Section, duha ka motor ang niagi sa iyang tungod diin ang nag-una nitutok apan ang nagsunod kalit nga nipusil sa biktima sa tuong bahin sa iyang abaga. Si Cabillo dali nga gidala sa Cebu City Medical Center, padayon pa ang imbestigasyon sa maong kaso.
Samtang usa ka 19 anyos nga batan-on nga nagduwa og basketbol diha sa Sitio Kamagayan, Barangay Lawaan 1, dakbayan sa Talisay ang gipusil sa silingan niini. Ang biktima nailhan nga si Jed Siega Alfanta, 19, nagpuyo sa nahisgutang lugar. Samtang ang suspetsado mao si Randolf Cañeda, 46.
Si PO3 Jason Del Campo sa Talisay City Police Station gidala sa Talisay City District Hospital samtang nasikop ang suspek kinsa namasangil sa biktima nga gikawatan siya niini og mangga. - /EIM) (BANAT NEWS)
- Latest
