Mayor Gica gitangtang na

CEBU, Philippines - Hingpit na nga napatuman sa Department of Interior and Local Government ang dismissal order sa Ombudsman batok kang Dumanjug Mayor Efren Guntrano Gica.

Alas 10:51 kagahapon sa buntag na-served ni DILG provincial director Jerome Gonzales ang order bisan wala sa iyang buhatan ang mayor.

Matud ni Gonzales nga wala sab gidawat sa secretary ang order hinungdan nga gi-post na lang kini sa iyang buhatan.

Si Gica gipatangtang sa Ombudsman human giingong giusab niini ang resibo sa usa ka restaurant sa Dakbayan sa Sugbo diin sila nangaon kuyog sa mga kapitan sa barangay.

Si Gobernador Hilario Davide III nanghinaut nga makakuha og temporary restraining order (TRO) ang mayor.

Sa pikas bahin gidawat na ni Davide ang resignation letter ni Aloguinsan Mayor Augustus Caesar Moreno kinsa nahukman sab nga matangtang sa serbisyo.

Si Davide nakamatikod nga paspas na ang Ombudsman nga mohukom sa mga kaso base sa gidaghanon sa mga natangtang ug nasuspenso nga mga lokal nga opisyal. “Pero usahay tan-aw nako sobra ra sad seguro ka harsh ang ilang mga decision ba. I think katong mga respondents nga public officials should be given a chance gyud,” matud ni Davide. (BANAT NEWS)