Umento sa pang-gasolina sa garbage truck tun-an

CEBU, Philippines - Susihon una ni Cebu City Mayor Tomas Osmeña kung angayan pa aprobahan ang hangyo ni Association of Barangay Councils (ABC) president ug Tisa Barangay Kapitan Philip Zafra nga umentuhan ang binuwan nga fuel allocation sa mga garbage trucks sa kabarangayan.

Gitataw ni Osmeña nga wala siya’y supak kung ang gipangayo nga umento sa gasolina matag garbage truck gamiton gyud alang sa truck sa basura.

Kuhaon sa mayor ang opinion sa Department of Public Services (DPS) mahitungod niini apan iyang gitataw nga wala siya kadungog nga dunay garbage truck nga nahutdan og gasolina.

Gipasabot ni Osmeña nga gusto lang niini nga manegurado nga dili gamiton sa binuang ang gasolina nga ihatag sa siyudad aron usab dili mausik.

Subay gihapon sa problema sa basura, gihulagway ni Osmeña nga ‘hambugero’ ang Barangay Kamputhaw.

Kini mahitungod sa problema sa basura nga nakit-an sa mayor nga nagtipun-og sa Q.C Pavilion nga wala makolekta.

Gihimug-atan ni Osmeña nga naningkamot ang siyudad nga makig-alayon sa Barangay Kamputhaw dungan sa pagbutyag nga dili obligado ang siyudad nga mohatag og allowance sa ilang garbage collectors tungod kay ang barangay dunay budget alang niini ug kini ang angay nga gamiton.

Gitubag usab niini ang alegasyon nga nasagulan og politika ang nahitabo sa Barangay Kamputhaw diin asoy sa mayor nga lakip ang ubang barangay iyang gipasidan-an ug gipahibawo mahitungod sa pagkolekta sa mga basura.

Samtang gipaluyuhan ni Osmeña ang plano ni Konsehal Eugenio Gabuya Jr. nga magbutang og transfer station sa Inayawan Landfill kay alang niya gikinahanglan kini sa siyudad ug makamenus usab sila sa bayranan.

Kahinumduman ang oposisyon nihulagway nga ang plano ni Gabuya sama ra nga gibuksan og balik ang Inayawan Landfill.

Gani ang chairman sa committee on laws, Konsehal Raymond Garcia, niingon nga gamay ra ang tsansa nga mapasar ang gidusong ordinansa ni Gabuya apan ang mayor niingon nga ‘harassment’ ang gihimo sa ilang kaatbang. (BANAT NEWS)