“Dumpit” gipatay samtang natulog

CEBU, Philippines - Patay diha-diha dayon ang ginganlan og “Dumpit” human kini gipusil sa iyang ulo samtang natulog uban sa iyang anak ug kapuyo sa may dalan Tabada sa Barangay Mambaling pasado ala una sa nakalabay nga kadlawon.

Si PO3 Jerry Genelaso, imbestigador sa homicide section sa Cebu City Police Office niingon nga hangtod karon padayon pa nilang giila ang tinuoray nga pangalan sa biktima kay alyas Dumpit lang ang nailhan sa iyang duha ka bulan pa lang nga kapuyo ug wala sab kini record sa barangay.

“Wala nakaila iyang kalive-in kay Dumpit ra daw nailhan niya, naa siya’y anak special child, unya kadtong kanhi ka-live-in niya, Dumpit ra gihapon ang nailhan nila nga ngalan”, matud pa ni Genelaso.

Ang kapuyo sa biktima nga si Elizabeth Asusena, nga nahinabi sa mga polis miingon nga samtang sila nangatulog, adunay niabot nga duha ka lalaki nga nag-jacket ug naghelmet dayon gipusil ang biktima sa ulo. Human  mamusil, dali sab nga misibat ang duha ka wala mailhing mamumuno.

Nakuha sa mga polis sa crime scene ang usa ka basiyo sa .45 kalibre nga pistola nga gituohang gigamit sa gunman.

Matud pa ni Genelaso nga sa pagkakaron, ang mga anggulo sa personal, selos sa nakalabay niya nga kapuyo ang gitutokan nila nga posibling motibo sa krimen.

Ang ka-live-in sa biktima mitug-an nga pipila ka adlaw na ang nakalabay nga gibaharan sab diay nga patyon ang biktima sa usa ka alyas Jong-jong gumikan sa away sa pamilya.

Nagpadayon karon ang imbestigasyon sa kapolisan aron mailhan ang namatay ug kun unsay tinuoray nga motibo sa krimen. (BANAT NEWS)