Pista Senyor gitapos pinaagi sa Hubo

CEBU, Philippines -  Opisyal nang gitak-opan ang mga kalihukan sa Pista Señor sa gipahigayon nga Hubo Mass kagahapon sa buntag diin gipahinumduman ang katawhan ni Fr. Pacifico Nohara Jr, ang Rector sa Basilica Minore del Sto. Niño nga bisan og kapila sila nahimong masalaypon apan ang Ginoo anaa gihapon kanunay andam mopasaylo.

Matud pa ni Nohara, ang “Hubo” nagtawag sa tawo sa paghubo sa ilang kaugalingon gikan sa pagkaulipon sa sala ug bag-uhon ang kaugalingon ug usbon ang kinaiya.

Sumala pa ni Nohara, walay tawo nga perpekto tungod kay tanang tawo ma deboto man ni Senyor Santo Niño masalaypon usab apan gihatagan ang tanan og kahigayonan nga mag-usab.

Si Nohara, nibutyag nga bisan ang mga apostoles dili perpekto ug adunay kakulangon ug sila mga ordinaryong tawo nga nasayop ug walay kalainan uban kanato.

Apan sila ang mga pinili kay bisan sa ilang kakulangon sinsero ug matinud-anon silang nisunod ug nipas-an sa ilang misyon ang pagsangyaw sa Maayong Balita.

Gitug-an ni Nohara nga dili ang kanunay nga pagsimba, pag-apil sa mga relihiyosong grupo ang sukaranan kun dili ang sud sa kasing-kasing sa tawo.

Dako kining hagit ngadto sa mga deboto sa Balaan nga Bata nga maghiusa sa usa’g-usa ug pamalandungan ang tema nga tinubdan sa kahiusahan nga makita dili lamang sa pulong apan lakip sa buhat.

Mahinangpon ug mapasalamaton si Nohara, sa tanang mga tawo nga nitambong sa mga kalihukan sa Pista Senyor bisan pa man sa mga hulga-hulga nga nikatap. Rowena D. V Capistrano (BANAT NEWS)