Bag-ong hepe sa Talisay taga Masbate

CEBU, Philippines - Pormal nang nilingkod sa iyang katungdanan isip hepe sa kapolisan sa dakbayan sa Talisay si PSupt. Emerson Dante.

Si Dante uban ni outgoing police chief PSupt. Aileen Recla nag-courtesy kang Mayor Eduardo Gullas kagahapon sa buntag.

 Ang maong bag-ong hepe sa Talisay gikan sa Anti-Illegal Task Group sa Camp Crame. Gradwado sa Philippine National Police Academy Class 2002 ug lumad nga taga Masbate. Nadestino na siya sa CARAGA Region, CIDG ug uban pang unit sa kapolisan.

 Si Mayor Gullas niingon nga andam siyang mosuporta sa kalihukan sa kapolisan lakip na ang tabang pinansyal. Gumikan niini, gikalipay ni PSupt. Dante ang maong pamahayag sa mayor.

Gumikan niini si Dante nangayo og duha ka buwan sa pagpakita sa iyang labok sa natad sa pagpatuman sa seguridad ug ang hugot nga kampanya batok sa ilegal nga drugas. Giisip niya nga dakung hagit kini kay ang Talisay nahimong numero uno sa pagsumpo sa ilegal nga drugas sa tibuok rehiyon 7 sa panahon ni Recla.

Iyang gipasabot nga siya dili politiko apan usa ka polis nga buot ipatuman ang balaud. (FREEMAN)