Dumpit balik sa CCPO

CEBU, Philippines - Nakabalik na sa Cebu City Police Office ang kontrobersiyal nga polis nga si SPO1 Adonis Dumpit human kini nakagawas sa prisohan ug gidestino sa Bohol Provincial Police Office.

Si Chief Supt. Noli Taliño, director sa Police Regional Office sa Central Visayas (PRO-7), nga nahinabi sa mga tigbalita miingon nga iya nang napirmahan ang kamandoan ni Dumpit nga ibalik kini dinhi sa Dakbayan sa Sugbo gikan sa Bohol.

Ang pagbalik ni Dumpit nahitabo human sa hangyo ni Cebu City Councilor Dave Tumulak, deputy mayor for police matters. Gitug-an sab ni Taliño nga kaniadto pang adlaw nga Lunes mi-report si Dumpit sa CCPO.  Ang PRO-7 director mipasabot nga ang dakbayan nagkinahanglan og polis nga sama ni Dumpit ilabi na nga kuwang gyud ang pwersa sa kapulisan ug daan na usab kining nadestino sa maong siyudad. Samtang bukas usab si Taliño kun gusto ni Cebu City Mayor Tomas Osmeña nga kuhaon pagbalik si Dumpit isip bodyguard.

Apan kinahanglan sa mayor nga mohimo og pormal nga hangyo ngadto na sa ulohan nga buhatan ug kang PNP Chief Ronald “Bato” Dela Rosa.

Si Tumulak gikatahong nagplano nga mopadala og suwat kang Taliño alang sa pormal nga paghangyo nga ibalik isip escort sa mayor si Dumpit.

Kahinumduman ang tulo ka police escorts ni Osmeña nga gilangkuban nila ni SPO1 Adonis Dumpit, SPO2 Richelle Tejano ug PO3 Romeo Batuhan ang gibalhin sa Bohol Police Provincial Police Office (BPPO) kay matud pa wala silay pagtugot nga mo-escort sa mayor.

Karon nga nakabalik na ang mga nahisgutan sa siyudad sa Sugbo gipaabot nga subling mopadala og suwat si Tumulak kang Dela Rosa nga ibalik ang tulo ka mga police isip escorts ni Osmeña.

 “We would rather suggest or request that these three policemen mabalik as escorts ni Mayor (Osmeña),” matud ni Tumulak.

 Si Dumpit naila na nga bangiitang polis dinhi sa dakbayan napriso ug nakombikto sa korte kaniadto tungod sa kasong homicide may kalambigitan sa kamatayon sa menor de edad nga gidudahang tulisan. Apan niapelar kini sa kaso ug natugotan usab nga makapiyansa maong nabalik kini sa serbisyo. (BANAT NEWS)