Laing suspek pagpatay ni Llaguno gipangita

CEBU, Philippines - Gipangita karon sa kapolisan ang katapusang suspetsado pagpatay sa pag-umangkon sa usa ka giingong drug lord tungod kay ang duha niya ka kaubang suspek pagpatay ni Annalou Llaguno ulhos-ulhos sila nga gipatay.

Si Cebu City police director Joel Doria miingon nga gusto nila nga makita ang drayber sa gisakyang motorsiklo sa mga hitman ni Llaguno nga maoy ikatulo nga suspetsado sa krimen.

Gusto ni Doria nga mahibaw-an kun kinsa ang mastermind sa pagpatay ni Llaguno, ang pag-umangkon ni Tata Llaguno nga giingong drug lord ug gipatay kaniadto sa Barangay Lorega-San Miguel.

Naglaum si Doria nga ang drayber sa motorsiklo nga gisakyan sa mga hitmen may kasayuran unta kun kinsa ang tawo nga nagpapatay kang Llaguno, nga kanhi asawa sa drug lord nga si Kerwin Espinosa.

Kaniadtong nakalabay’ng gabii, gipusil patay si Michael Lendio, 41, samtang nagsaulog sa iyang birthday uban sa iyang mga higala didto sa Barangay San Nicolas Proper.

Ang laing suspek sa pagpatay ni Llaguno nga si Richard Jungoy nga naila usab nga si Richard Ngoyong, gipusil patay sab sa wala pa hiilhing tawo.

Matud ni Doria nga sila si Lendio ug Jungoy nagsilbe nga escort ni Jaguar kun duna sila’y dagko nga transakyon sa drugas ug nagsilbe sab sila nga hitmen sa grupo.

 Ang mga imbestigador sa homicide section sa Cebu City Police Office mitug-an nga ang drayber ug boyfriend ni Llaguno miila gyud ni Lendio nga maoy mitiwas og pusil patay sa biktima kay wala man siya nagtaptap sa iyang nawong paghimo niya sa krimen.

Giawhag ni Doria ang ikatulong suspek pagpatay ni Llaguno nga motahan na sa kapolisan aron malikay siya sa delikadong kahimtang kay posible nga may nagtinguha na usab og dautan kaniya.

Malaumon si Doria nga makatug-an ang ikatulong suspek kun kinsa ang nagpapatay kang Llaguno. Nahibulong kaayo si Doria ngano nga ang mga suspek sa pagpatay ni Llaguno parehong gipangpatay.

Ang kapolisan nakaila na sa ikatulo nga suspek pagpatay ni Llaguno. (BANAT NEWS)