Magsuon, dalagita gitipi

CEBU, Philippines - Duha ka magsuon ug usa ka dalagita ang gipamusil patay sulod sa usa ka balay diha sa Victor Village, Tres de Abril, Punta Princesa ning Dakbayan sa Sugbo pasado alas 11 kagahapon sa buntag, drugas maoy gitutokang motibo sa pagpamusil.

Ang magsuon giila nga sila si Ramonito Ibona, 55, ug Cesario Ibona, 45, samtang patay sab ang ilang kauban nga babaye nga minor de edad nga si Meah Clarissa Limbaga, 17,  pulos nagpuyo sa maong dapit.

Sumala pa ni Police Officer 3 Winston Ybañez, imbestigador sa Homicide Section sa Cebu City Police Office nga nahinabi sa Banat News kalit lang nga miabot ang duha ka lalaki nga nagkalo ug ang usa niini ang nagdala og armas.

Giingong nasugatan niini sa pultahan ang usa sa mga kauban sa mga biktima nga si alyas Christian ug kini giwakli sa gunman ug gipangita si Ramonito. Sa dihang nakasulod na sa balay ang gunman didto na gipamusil ang mga biktima. Human sa hitabo apil sab nga gipangita si alyas Christian apan nakadagan na kini palayo.

Sulod sa balay narekober sa kapulisan ang mga basiyo sa 9mm pistol ug walo ka pakete sa gituohang shabu.

Matud pa ni Ybañez nga posibling dili lang si Ramonito ang target kun dili lakip ang igsuon niini ug ang minor de edad tungod kay silang tanan diha sa sud gipamusil.

Ang hepe sa Punta Princesa Police Station, Sr. Insp. Alvin Llamedo nga nahinabi sa Banat News mikompirmar sab nga nalambigit sa kalihokan sa drugas si Romonito ug natukhang na kini apan padayon gihapon nga nagbaligya og drugas.

Gitug-an ni Llamedo nga ang 17 anyos nga babaye maoy gigamit nga “courier” ni Ramonito sa iyang kalihokan sa drugas matag higayon nga duna kini ipahatod nga drugas sa iyang mga kliyente. Gikompirma kini sa inahan sa 17 anyos sa dihang nahinabi ni Llamedo.

“Giangkon sa inahan kay ni-estorya man siya nako nga naapil iyang anak, iyaha pa gani daw na nga gitambagan nga moundang na kay basin maamong, natinuod gyud hinuon,” matud pa ni Llamedo.

Si Llamedo miingon nga ang balay ni Ramonito adunay padlock sa gate ug aduna say sekretong pultahan sa likod. Ug base sa nadawat nilang report panagsa ra kaayo mogawas si Ramonito kay pirmi nga nakakandado ang balay niini.

Usa sa ilang gisundan karon ang anggulo sa drugas nga misangpot sa panagbikil sa ilang grupo hinungdan nga gipamatay ang mga biktima.

Mandaue

Patay usab ang gidudahang pusher nga gipusil sa usa ka lalaking nagtaptap og panapton sa nawong diha sa bilyaran sa dalan M.L. Quezon, Brgy. Maguikay, Dakbayan sa Mandaue sa miaging Domingo sa  buntag.

Si Police Officer 2 Rogie Cabra sa Presinto 4  sa Mandaue City Police Office (MCPO) miila sa biktima nga mao si Isidro Opo, 31, taga Maria Luisa Road, Brgy. Banilad sa maong dakbayan kinsa nalakip usab sa listahan sa nahisgotang presinto nga drug pusher sa maong lugar.

Matud pa ni Cabra ang mamumuno nagsakay og motorsiklo ug mi-parking diha sa may bilyaran dayon misud ug gipusil ang luyong bahin sa ulo sa biktima.  Wa tangtanga sa mamumuno ang helmet ug may taptap nga panapton sa nawong niini ug yanong mibalik sa motor ug mipalayo sa lugar.

Ang mga sakop sa Emergency Rescue Unit Foundation (ERUF) misuway pagtabang sa biktima apan patay na kini ug wala na madala sa tambalanan. (BANAT NEWS)