Pusher nga bana sa maestra, laing usa sikop

CEBU, Philippines -  Kapin sa P100 mil nga kantidad sa shabu ang nasakmit sa mga sakop sa Argao Police human ilang gisilbi ang search warrant batok sa 50-anyos nga lalaki sa Barangay Talaga, Argao pasado alas 6 kagahapon sa buntag.

Ang dinakpan giila nga si Ulysses Tabanao, nagpuyo sa maong dapit kinsa ang asawa usa ka maestra.

Matud ni Senior Insp. William Homoc, hepe sa Argao Police Station, nga anaa sa target list sa kapolisan si Tabanao nga gihulagway nga idlas sa kamot sa balaud.

Atol sa operasyon, matud ni Homoc nga iyang gitayming nga nigawas ang asawa ug nisulod dayon ang mga polis sa balay ug narekober sa lawak ni Tabanao ang mga pinaketeng shabu nga gipangpasok sa bongbong.

Matud ni Homoc nga ang asawa wala gyud nagtuo nga namaligya og drugas ang iyang bana kay bugtong nahibaw-an niya nga kini tiggamitan lang. Gitanggong na sa selda sa kapolisan sa Argao si Tabanao nga mag-atubang og kaso sa paghupot og ilegal nga drugas.

Samtang nadakpan na gyud sa kapolisan ang gikatahapang pusher nga giingong dangog kaayo sa kapolisan sa gihimong buy-bust operation sa Purok Molave, Tayud, Lungsod sa Liloan alas 8 pasado sa buntag sa niaging adlaw.

Si PO3 Jayson Gayo sa Liloan Police Station niila sa nadakpan nga si Steve Manatad Barrosa, 42, minyo nga nagpuyo sa nahisgutang dapit ug nakuhaan og 20 ka gagmay nga pakete sa shabu kauban sa P800 nga salapi nga gituohang halin.

Base sa Dangerous Drugs Board (DDB) nga balor, ang shabu mokabat sa P4,200 ang kantidad ug giduso sa PNP Crime Laboratory alang sa paghan-ay sa tukmang kaso nga ipasaka batok sa suspek. (BANAT NEWS)