Davide, Magpale may bag-ong sakyanan
CEBU, Philippines - Aduna nay bag-ong sakyanan sila si Gobernador Hilario Davide III ug Bise Gob. Agnes Magpale.
Ang duha pulos Isuzu SUV, kolor brown kang Davide ug puti kang Magpale.
Ang matag usa nagkantidad og P1.8 milyones.
Matud ni Jone Seigfred Sepe, pangulo sa Provincial General Services Office, nga dugay na nila napalit ang maong mga sakyanan sa wala pa ang eleksiyon apan nalangan ang pag-award tungod sa election ban.
Samtang nagplano usab ang Kapitolyo nga palitan og bag-ong sakyanan nga 4x4 double cab ang mga sakop sa Provincial Board.
Gigahinan na og P28 milyones diin matag usa gibana-bana nga mokantidad og P1.5 milyones.
Ang kasamtangang mga sakyanan nga Toyota Hilux sa mga bokal walo na ka tuig sukad sa pagpalit.
Si Sepe nagkanayon nga ang mga karaang sakyanan ipagamit na lang sa mga department heads ug ubang buhatan sa Kapitolyo nga nanginahanglan og sakyanan. (BANAT NEWS)
- Latest
