‘Ma’am Inday’ patay na

CEBU, Philippines - Nagbangutan karon ang pamilyang Garcia nunot sa pagkamatay sa giila nga “Ma’am Inday” sa kadaghanan nga si retired judge Esperanza Fiel-Garcia niadtong Lunes sa gabii sa edad nga 82-anyos.

Ang asawa ni kanhi gobernador ug kongresista Pablo “Pabling” Garcia dugay na nga nakigbugno sa sakit sa kidney apan padayon ang pag-alagad isip founding chairman sa Cebu CFI Community Cooperative nga iyang gitukod niadtong 1970 hangtud sa katapusan niyang gininhawa.

Ang patay’ng lawas ni Ma’am Inday anaa gipahiluna sa Crystal Palace sa Nivel Hills, Lahug, Cebu City ug wala pa masayri ang petsa sa paglubong sa pagkutlo ni’ng balita.

Sama sa magtiayong Garcia, kadaghanan sa ilang mga anak ang nalambigit sa serbisyo publiko sama ni kanhi gobernador ug karon Kongresista Gwendolyn Garcia; kanhi GSIS president ug general manager, Atty. Winston Garcia; kanhi kongresista, Atty. Pablo John Garcia, Dumanjug Mayor Nelson Gamaliel Garcia ug kanhi Barili Bise Mayor Marlon Garcia.

Ang Cebu CFI Community Cooperative nagsugod lang sa P200 sa 20 niya ka sakop apan karon moabot na sa P10 bilyones ang assets ug may 90,000 na ka sakop sa Kabisay-an ug pipila ka bahin sa Luzon ug Mindanao.

Naangkon ni Ma’am Inday ang Baul Award isip Model Filipino gikan sa Filipino Foundation ug ang Tony Martin Leadership Awards gikan sa VICTO.

Kauban ni Justice Francisco Tantuico, ilang gitukod ang credit union niadtong 1970 aron pagluwas sa mga kawani sa Court of First Instance (CFI) gikan sa mga tigpatanto. (BANAT NEWS)