15 ka tawo sikop sa drugas
CEBU, Philippines - Miabot sa 12 ka mga tawo lakip sa target sa kapulisan ang nadakpan sa mga sakop sa Criminal Investigation and Detection Group-7 atol sa pagronda sa usa ka drug den diha sa Sitio San Vicente, Barangay Tugbungan, Consolacion pasado alas 6 niadtong nakalabay nga adlaw.
Target sa kapulisan mao si Omar Judilla Obejero, 27, nga giingong sakop sa Dansoy Group, usa ka bag-ong grupo nga gipanid-an sa kapulisan nga nagbasi sa maong lungsod.
Ang maong operasyon gipangulohan ni Chief Inspector Maximo Sumeg-ang Jr., hepe sa CIDG Cebu Province, human sa pipila ka semana nila nga gihimong pagpaniid sa lugar. Nasikop usab ang usa ka 59 anyos nga biyuda nga si Exequilla Sasing, nga giingon nagsilbing tigbantay sa maong drug den.Gamit ang buy-bust money nga P300 nakapalit og usa ka pakete sa gituohang shabu ang asset sa kapulisan gikan ni Obejero hinungdan nga gisikop sa kapulisan.
Ang laing onse ka mga tawo nga naglakip ni Sasing ang nasikop usab sa kapulisan sulod sa drug den. Narekober sa kapulisan ang 51 ka pakete sa shabu nga mitimbang sa 10 gramos ug duna’y kantidad nga P118, 000.00.
Sa laing bahin, tulo ka lalaki ang nadakpan samtang usa nakaikyas sa managlahing buy-bust operation sa Dakbayan sa Lapu-Lapu sa miaging Sabado nga mikantidad og dul-an P20 mil. Nasikop sa kapolisan si Joel Dela Cerna, 43, ug si Jade Bulangcas, 26 , diha sa Sitio Sangi New Road, Barangay Pajo ug si Armando Dungog, 18. (BANAT NEWS)
- Latest
