Adis-adis nisunog sa ilang balay
CEBU, Philippines - Gisikop ang usa ka adis-adis human nisuway sa pagsunog sa ilang panimaye sa Bulacao, Dakbayan sa Talisay niadtong Domingo sa hapon.
Ang dinakpan nailhan nga si Jerome Judico, 37-anyos, ulitawo nga nagpuyo sa nahisgutang lugar. Ang amahan sa suspek nga si Honorato Judico, 66, ang nitug-an sa Banat News nga pwerte’ng gubaa na sa kaugmaon sa iyang anak tungod kay nadala kini sa bisyo nga makapatay sa kaugalingon.
"Niapil gyud ni siya ana’ng bisyo nga wala’y ayo," matud ni Honorato.
Matud niya nga kalit lang nga nag-aso-aso ang kwarto sa iyang anak hinungdan sa ilang pagsusi niini. Didto iyang nakita ang iyang anak nga adis-adis nga nagpunay og dagkot sa mga butang sulod sa iyang kwarto.
Ang kayo nikatap sa laing kwarto sa iyang panimaye hinuon gumikan sa tabang sa ilang mga silingan napawong ang kayo.Gidakop sa mga barangay tanod si Jerome ug gibilanggo. Si Honorato ang pursigido sa pagpasaka og kaso batok sa iyang anak. (BANAT NEWS)
- Latest
