Balikbayan gipusil

CEBU, Philippines - Usa ka balikbayan gikan sa Switzerland nga nagnegosyo og pautang og kwarta ang gipusil sa wala mailhing mga tawong nagsakay og motorsiklo diha sa Buhisan Road, Brgy. Punta Princesa ning Dakbayan sa Sugbo pasado alas 9 kagahapon sa buntag.

Ang biktima giila nga si Ricardo Paras, 57, lumad nga taga Tarlac ug temporaryo nga nagpuyo sa maong dapit.

Sumala pa ni Senior Police Officer 2 Ruth Violango, imbestigador sa Homicide Section sa Cebu City Police Office nga nahinabi sa Banat News,  samtang nagbarog  ang biktima sa maong dapit kalit lang naabot ang usa ka XRM nga motorsiklo kolor itom nga adunay sakay nga usa ka lalaki.

Walay daghang pangutana kalit lang mibunot og armas ang gunman ug dayon pusil sa biktima.

Duha ka bala ang milubong sa likod sa biktima sa wala pa masayri nga kalibre sa armas ug paspas usab kaayo nga misibat palayo sa lugar.Ang mga residente sa maong dapit mao na usab ang midala sa biktima sa usa ka pribadong tambalanan.

Usa sa gidudahan ni Violango nga lagmit gumikan sa negosyo nga pautang sa biktima ang motibo sa krimen ug gituohan usab nga nakaila ang biktima sa gunman kay wala man kini nagtaptap sa iyang nawong.

Plano sa kapulisan nga maestorya ang biktima aron makakuha usab sila og dugang impormasyon alang sa kasulbaran sa krimen. (BANAT NEWS)