Mga Sitoy suporta ni Duterte
CEBU, Philippines – Suportahan sa pamilyang Sitoy sa Dakbayan sa Lapu-Lapu ug Lungsod sa Cordova ang kandidatura ni Davao City Mayor Rodrigo Duterte sa pagka-presidente.
Kini bisan og managlahi ang partido sa mga Sitoy sa umaabot eleksiyon karong Mayo 9.
Si kanhi Cordova mayor Celedonio “Celsi” Sitoy kandidato sa pagka-kongresista sa Dakbayan sa Lapu-Lapu kauban ni Engr. Rolando Patalinjug sa pagka-mayor ubos sa Partido Demokratiko Pilipino-Lakas ng Bayan (PDP-Laban) nga partido ni Duterte.
Ang grupo ni Sitoy ug Patalinjug nagmugna usab og lokal nga grupo nga gitawag og Team Kusgano Movement for Better Lapu-Lapu. Ang Kusgano maoy pangan sa amahan ni Datu Lapu-Lapu.
Ang igsuon ni Sitoy nga si Cordova Mayor Adelino “Addy” Sitoy sakop sa Liberal Party nga gipangulohan ni Mar Roxas nga kaatbang ni Duterte.
Matud ni Patalinjug nga diha’y tigum nila ni Duterte nga nitambong usab si Addy.
Kini gikompirmar usab sa anak ni Addy nga si Bokal Arleigh Jay Sitoy.
Si Arleigh sakop sa PDP-Laban ug kandidato sa pagka-mayor sa Cordova atbang sa iyang igsuon (half-sister) nga si Bise Mayor Mary Therese Sitoy-Cho sa LP.
Si Addy sa iyang bahin niingon nga mopahibawo ra siya sa saktong panahon sa iyang personal nga pilion sa pagka-presidente nga dili maglambigit sa iyang kaubanan sa partido. (BANAT NEWS)
- Latest
