P2m shabu iya sa ex-cop

CEBU, Philippines - Kapin sa P2 milyones ang kantidad sa shabu nga nasakmit sa mga sakop sa Provincial Intelligence Branch sa Cebu Provincial Police Office gikan sa usa ka kanhi polis nga nasikop sa Dakbayan sa Talisay pasado alas 8 niadto’ng Biyernes sa gabii.

Giila ang dinakpan nga si Francisco Keyserlin Martin Gorosin III kinsa katapusang nadestino sa isla sa Camotes sa ranggo nga Police Officer 3.

Sumala pa ni Senior Insp. Leo Logroño, team leader sa operasyon, nga una nila nga gisilbi ang search warrant batok ni Gorosin sa Canario, Lipata, Minglanilla apan wala sa balay ang suspek.

Sa pagsubay sa kapolisan sa balay ni Gorosin ila’ng narekober ang daghang shabu.

Human sa pagsubay, nakadawat og impormasyon ang taga PIB nga toa sa iya’ng bar nga Planet Zero sa San Isidro, Dakbayan sa Talisay diin dali usab kini nga gisusi sa kapolisan. Sigun pa ni Logroño nga plano unta nila nga i-buy-bust si Gorosin apan ila na la’ng kini’ng deretso nga gisikop human nakit-an nga nagdala og armas.

Matud ni Logroño nga nagbantay gyud sila sa ila’ng pagsikop ni Gorosin human sila nahibalo nga armado ug nagtuo ang mga polis nga mosukol.

Hinuon sa pagsikop sa kapolisan wala na hinuon kini nipalag.

Nakuha sa mga polis gikan ni Gorosin ang usa ka .45 caliber nga pistola ug mga pinakete’ng shabu.

Sa kinatibuk-an mokabat sa 200 gramos ang shabu nga nasakmit.

Si Logroño niingon nga natangtang sa serbisyo si Gorosin human nasikop kaniadto sa National Bureau of Investigation sa kaso gihapon sa drugas diin tuig 2012 hingpit kini’ng natangtang sa serbisyo.

Samtang sa laing operasyon sa PIB, sikop sab sa kapolisan ang usa ka Herry Cartilla nga taudtaud na nga gipanid-an sa kapolisan sa Mantalongon, Lungsod sa Dalaguete.

Kapin sa P400 mil nga shabu ang nasakmit sa mga awtoridad. Ang operasyon pinasikad usab sa search warrant nga gi-isyu ni Regional Trial Court Judge Gilbert Moises.

Gitanggong na sa selda sa kapolisan ang mga dinakpan nga gikatakda’ng pasakaan og kaso. - /GMR (BANAT NEWS)