Tour guide gilabnihan sa Colon

CEBU, Philippines - Nabiktima sa pagpanglabni sa dalan Colon ang usa sa inila’ng tour guide sa Sugbo nga si Balbino “Ka Bino” Guerrero kinsa nakuhaan sa iyang iPod nga balor og P30 mil kagahapon sa udto.

Hinuon ang suspek nga si Mariano Castroverde Jr. ang nadakpan human dali nga nagpatabang si Guerrero sa mga tawo sa lugar.

Nunot niini, subling nanawagan sa publiko ang hepe sa Police Community Relations (PCR) nga magbantay sa mga snatchers ug mga mangunguot.

Hinuon matud ni Chief Insp. David Señor nga wala pa’y mga dagku’ng grupo gikan sa Mindanao ang ania sa Dakbayan sa Sugbo niining pagsaulog sa Sinulog 2016.

Ang City Intelligence Branch ug Theft and Robbery Section sa Cebu City Police Office nitutok usab sa pag-alkontra sa unsa man nga grupo nga ila’ng ma-monitor.

Si Superintendent Julian Entoma, officer-in-charge sa Mandaue City Police Office, nipahimangno usab sa mga deboto sa pagbantay sa mahalong mga butang atol sa Traslacion sa kadalanan sa dakbayan.

Matud ni Entoma nga hugot usab nilang bantayan ang Saint Joseph National Shrine diin bilaran ang imahe sa Senior Santo Niño sa Biyernes sa gabii.

Samtang si suspended Cebu City Mayor Michael Rama, chairman sa Sinulog Foundation Inc., nakigtagbo sa crowd control team nga gilangkuban sa Philippine National Police, Armed Forces of the Philippines ug ubang sector ug academe.

Nasabutan sa grupo nga sa dili pa magsugod ang Grand Parade mag-abot na sila daan aron hinay-hinay nga makapwesto sa ila’ng tagsa-tagsa ka poste nga dili gyud angay biyaan.

Si Senior Superintendent Mariano Batiancela, pangulo sa Task Force Sinulog, niingon nga duna’y walo ka sectors diin ang mga police station chiefs mao’y commander ug ang ila’ng deputy ang mga representante sa AFP inabagan sa academe.

Ang matag sektor gibahin sa tulo ug gibana-bana nga dul-an sa 2,000 ka police personnel ang ipakatap.

Gipasabot ni Batiancela nga daghan sila og gibantayan nga mga panghitabo sa niaging Sinulog nga dili na masubli karon. (BANAT NEWS)