Taxi gi-carnap, gipamasaheroan

CEBU, Philippines - Nasikop sa kapolisan ang usa ka suspek sa pagpang-carnap og taxi human kini nasigpatan nga nagmaneho og taxi sa Villagonzalo II, Tejero, Dakbayan sa  Sugbo.

Ang gidakop mao si Romel Montellano, 30, diha’ng naipit sa trapik samtang nagmaneho sa Aerol Taxi nga duna’y tampered nga plate number.

Si Montellano ang gitumbok nga nikuha sa taxi nga gimaneho ni Ernesto Hinonsalao sa niagi’ng semana human gitulis sa may Potenciano Larazzabal Avenue sa Dakbayan sa Mandaue.

Martes sa hapon usa ka taxi drayber ang nakabantay sa pareho nga taxi nga gikataho’ng gi-carnap nga naungot sa trapik sa Tejero hinungdan nga kini nitaho sa Highway Patrol Group-7.

Si Senior Supt. Joselito Macanas, hepe sa HPG-7, nagkanayon nga swerte lang kay trapik niadto’ng higayona hinungdan nga wala na nakadagan ang taxi.

Suway pa unta nga nisutoy og dagan si Montellano apan kini nadakpan sa mga istambay.

Ang suspek nga nahinabi sa mga tigbalita niangkon hinuon sa pasangil ug niingon nga tulo ka sakyanan ang iya’ng gi-carnap apan ang sakyanan ni Hinonsalao ang iya’ng gitagoan, giilisan og plate number, pangalan ug iya’ng gigamit.

Sumala pa sa suspek nga nahimo niya ang krimen kay wala siya’y trabaho ug anaa sa tambalanan ang iya’ng igsuon nga nagkinahanglan og kwarta.

Kaso’ng highway robbery ug carnapping ang ipasaka sa kapolisan batok sa suspek. (BANAT NEWS)