Election gun ban na sugod Domingo

CEBU, Philippines – Hingpit na nga magsugod ang election gun ban karong Domingo ug molungtad kini hangtud sa Hunyo 8, 2016.

Nunot niini si Provincial Election Supervisor Lionel Marco Castillano nipasidaan sa mga legitimate nga nanag-iya og mga armas nga dili nila madala ang ila’ng mga armas gawas sa ila’ng panimalay kung wala sila’y permit o exemption gikan sa Commission on Elections.

Si Castillano nagkanayon nga bisan pa og adunay permit to carry (PTC) ug dunay lisensiya ang armas panahon sa election gun ban, ang mga tag-iya og armas dili makadala-dala niini gawas sa ilang balay gawas lang kung may special permit gikan sa Comelec.

Apan giklaro ni Castillano nga ang gi-exempt sa balaud ug sa Comelec Resolution kabahin sa gun ban mao ang Armed Forces of the Philippines (AFP),  Philippine National Police (PNP) ug uban pa’ng law enforcement sa gobiyerno.

Matud ni Castillano nga sa civilian ang exempted mao ang mga cashier ug disbursing officers apan nagkinahanglan sila’ng mo-file og exemption sa buhatan sa Comelec.

Ang mga law enforcers dili na kini kinahanglan nga maghupot pa og papel o dokumento sa iya’ng exemption tungod kay ubos sa balaud exempted na man sila ug ang mga pangan for information purposes na lang kini sa Comelec panagana kung ang usa kanila ikiha og kalapasan sa gun ban ug aron makakuha og certification nga exempted siya.

Ang pagduso og application for exemption dili individual kun dili tingub kini o usahon.

Ang AFP, PNP ug uban pa’ng law enforcement agency sa gobiyerno isip compliance kinahanglan usab sila mo-apply og exemption.

Apan kung ang mga nahisgutan adunay laing armas nga dili isyu sa gobiyerno kinahanglan sila’ng mo-apply og lahi nga exemption sa Comelec sa personal nila nga armas.

Subay niini, si Castillano nipahimangno sa mga security guards nga bisan og aduna sila’y exemption gikan sa Comelec dili nila pwede’ng dalhon ang ila’ng service firearms gawas sa ila’ng balay lakip na sa mga bala.

Ang Comelec magpahigayon na usab unya og PNP-Comelec checkpoints alang sa implementasyon sa gun ban. – /GMR) (BANAT NEWS)