Napaig nailhan na

CEBU, Philippines – Nailhan na sa mga imbestigador kung kinsa kadtong lawas nga napaig atol sa pag-ulbo sa sunog sa usa ka bodega sa may dan Arellano Boulevard, Barangay San Roque sa Dakbayan sa Sugbo niadtong miaging hapon.

Ang biktima giila nga si Romel Altabarino, 30, lumad taga Dakbayan sa Bais sa Negros Oriental.

Si Altabarino nakit-an nga patay na sud sa nasunog nga building nga gipanag-iya sa pamilya Madrigal apan giabangan sa duha ka kompanya nga nagbaligya og mga “imported furnitures” nga gikan sa China ug mga sakyanan ug appliances niadtong miaging Sabado.

Wala kini dayon mailhi sa mga residente tungod kay dili na maklaro ang nawong niini tungod sa pagkapaig hangtod nga gikompirmar kini sa mga barangay tanod.

Matud ni Senior Police Officer 2 Rommel Bancog sa Homicide Section sa Cebu City Police Office, nga aduna sila’y nadawat nga mga taho nga ang biktima aduna’y kakulian sa pangisip.

Base sa imbistigasyon, niadtong alas-3 sa hapon niadtong miaging Huwebes, gidakop si Altabarino sa mga kawani sa Philippine Coast Guard human nakit-an nga nagsawom-sawom sa restricted area sa mao nga lugar.

Matud pa nga gi turnover dayon siya ngadto sa barangay hall sa Barangay San Roque ug kini gi-interview sa mga opisyales sa barangay  kung diin ilang nabantayan nga dili normal ang linihokan ug pangistorya niini.

Gitagaan na lang og makaon ang biktima apan pila ka minutos, kalit lang kining nawala sulod sa barangay hall. Matud ni Bancog, ang mga residente  mibutyag nga ilang nakit-an si Altabarino nga naglatay-latay sa mga container vans kilid sa bodega nga nanguha usab sa mga hinayhay sa mga kabalayan maong gigukod kini sa mga estambay apan kalit nga nahanaw.

Sunod na lang nahibaw-an nga nakit-an kini ug napaig na sud sa bodega. Nasuta usab sa mga imbestigador nga adunay bahin sa bodega nga walay atop ug posible nga didto nahulog o nisulod ang biktima human kini naglatay-latay sa mga container vans.

Nihunong sa operasyon ang EMBL niadto pang Disyembre 22 ug ang Du EK Sam nanirado pud niadtong Disyembre 31 alang sa bakasyon ug pagsugat sa Pasko ug Bag-ong Tuig,

“Posible nga na-trap ni siya didto kay ang gwardiya, ingon man siya nga dili sad sila pirmi mag-check sa sulod. Mosulod ra man kuno siya og naa’y kuhaon,” matud ni Bancog. – /EIM) (BANAT NEWS)