PRO-7 nikombate batok drugas sa 2015

CEBU, Philippines – Dugoon apan nagmalampuson ang kampanya sa Police Regional Office-7 batok sa ilegal nga drugas ang tuig sa 2015 ubos sa pagdumala ni Chief Superintendent Prudencio Tom Bañas.

Gani ang PRO-7 maoy gikonsiderar sa Camp Crame nga “best performing region” batok sa ilegal nga drugas sa tibuok nasud.

Si Bañas kinsa gibalhin na ngadto sa kaulohan sayo sa buwan sa Disyembre , mideklarar dayon og all-out-war batok sa illegal nga drugas sa unang adlaw sa iyang paglingkod sa PRO-7, 18 ka buwan na ang nilabay.

Wa hinuon siya pakyasa sa iyang mga sakop, mokabat sa P307.2 milyones nga drugas ang nasakmit ug daghang mga drug personalities ang nadakpan o napatay.

Ang Provincial Anti-Illegal Drugs Special Operations Task Group (PAIDSOTG) sa Cebu Police Provincial Office mao usab ang giila nga labing maayo nga  PAIDSOTG sa tibuok nasod tungod sa kadaghan sa ilang malampuson nga operasyon.

Labing dako nga operasyon sa maong buhatan mao ang pagkasakmit sa kapin sa P23 milyones nga shabu gikan sa usa ka babaye ug sa iyang bayaw atol sa buy-bust operation sa Lungsod sa San Remigio niadtong Mayo.

Ang pagkasikop ni Maribel Arcenal, 33, ug Eduardo Arcenal, 45, sa Sitio Calcalan, Barangay Poblacion, sa maong lungsod resulta sa usa ka bulan nga pagpaniid nila sa mga sakop sa Provincial Intelligence Branch ug PAIDSOTG.

Ang kapolisan nakasakmit sa duha ka kilo nga shabu gikan sa duha nga mobalor og P23,659,000.

Gawas sa PAIDSOTG sa CPPO,  ang City Intelligence Branch sa Cebu City Police Office usa usab sa malampuson sa PRO-7 sa kampanya batok sa ilegal nga drugas.

Usa sa ilang nasikop mao si  Joseph Erson Opena, 21, sa Magsaysay Street, Barangay Suba, nga nakuhaan og kapin sa P6 milyones nga kantidad sa shabu sa buy-bust operation sa CIB.

Gihulagway si Opena nga “level 2 drug pusher,” ug ang iyang pagkasikop resulta sa usa ka text message nga nadawat sa CIB gikan sa concerned citizen bahin sa iyang illegal nga kalihokan.

Lima ka dakong putos sa ice water nga puno sa gidudahang shabu ang nakuha ug pipila ka gagmay nga pakete usab niini ang nakuha gikan sa higdaanan sa suspek.

Samtang niadtong Hulyo ang mag-live-in partner nga sila si Leny dela Cruz ug Raffy nasikop human sila nakuhaan og P1.18 milyon nga shabu.

Nasikop usab sa CIB ug Philippine Drug Enforcement Agency Regional Office-7 ang usa ka “bigtime drug pusher” sa buy-bust operation nga gipahigayon nila sa  Sitio Mangga, Barangay Mambaling. Gidakop si Marilou Sabello, 54, human siya mibaligya og P5 mil nga shabu sa mga sakop sa polis ug PDEA.

Niadtong Hulyo lang gihapon, laing live-in partner ang nasikop human nakuhaan sila og P12 milyones nga shabu sa  buy-bust operation sa Leon  Kilat  Street, Cebu City.

Si Hazel Rose Dabatos, 20, ug ang iyang live-in partner Lemuel Ivan Abenoja, 21, gidakop sa mga polis ug PDEA agents human nga gitunolan sila sa duha og pinutos nga shabu.

Apan ang subject sa maong operasyon nga ginganlan og “Buds” nga taga A. Lopez Street ug ang usa ka “Alfiel Chui” nakasibat sa maong operasyon.

Si Dabatos, upat ka buwan nga mabdos niadtong tungora ug ang iya untang kitaon maoy iyang gamiton sa gasto sa iyang pagpanganak.

Bisan ang gipasanginlang “bigtime druglord” dinhi sa dakbayan sa Sugbo nga si Jeffrey “Jaguar”  Diaz sa Barangay Duljo-Fatima gironda usab sa CIB niadtong Septiyembre.

Di momenos P4 milyones nga balor sa gidudahang shabu ang nasakmit sa CIB gikan sa Diaz Compound nga gikan sa 12 ka balay nga pulos mga paryente ni Jaguar.

Apan matud pa ni Senior Supt. Romeo Santander, hepe sa CIB nga mi-leak ang ilang operasyon kay hipos na kaayo ang lugar dihang ilang gisulod aron i-serve ang mga search warrants nga giisyu ni Regional Trial Court Judge Soliver Peras.

Kuyog sa mao nga operasyon  ang Philippine Drug Enforcement Agency-7, Special Weapons and Tactics sa Cebu City Police Office, Regional Public Safety Battalion-7 ug  Women’s and Children’s Protection Desk operatives sa CCPO.

Gawas ni Jaguar, sila si Noel, Reynaldo, Rodel, Ruddy, Rodrigo, Amelia, nga nag-apelyido og Diaz, ug sila si Scarlet Pag-usara ug Sonny Sisneros target ‘sab sa maong operasyon.

Apan bisan sa pipila ka operasyon nga gihimo sa kapolisan pabiling idlas si Jaguar ug pabiling gawasnon hangtod   karon.

Usa kini ka dakong hagit sa mihulip kang Bañas nga si Chief Supt. Manuel Gaerlan kung mamentinar ba niya ang arangkada sa PRO-7 batok sa ilegal nga drugas dinhi sa rehiyon. (BANAT NEWS)