Sticker sa DSWD wa’y bayad
CEBU, Philippines – Gitin-aw sa Department of Social Welfare and Development-7 nga wala’y bayad ang stickers nga gipamilit sa kabalayan nga gisusi alang na sa pag-ila sa mga kabus nga pamilya.
Kini human adunay report nga nagkantidad og P70,000 ang gold sticker ug P30,000 ang silver nga gipamilit sa kabalayan.
Matud sa tigpamaba sa DSWD-7, Leah Quintana, nga dili tinuod ang mao’ng report.
Gibutang ang mao’ng stickers aron pagpamatuod nga nahuman na og assess ang pamilya. Nasayran nga niadto’ng Oktubre nakadawat og taho ang ahensiya gikan usab sa ila’ng Facebook page.
Anaa na sa evaluation ang lista ug gikatakda nga moluwat unya ang DSWD-7 og lista sa matag barangay aron mahibawo ang matag pamilya.
Gibutyag usab ni Quintana nga mamahimo’ng moreklamo ang pamilya kun dili sila malakip sa lista apan ipaubos gihapon kini sila sa validation. (BANAT NEWS)
- Latest