Operasyon vs pabuto gilusad

CEBU, Philippines – Samtang nagkaduol na ang pagsugat sa Bag-ong Tuig, gihingusgan usab karon sa kapolisan ang pagpanakop sa mga gibaligyang mga pabuto diha sa nagkadaiyang mga lugar dinhi sa Sugbo.

Nasikop sa kapolisan ang gibanabanang P31, 620 nga illegal nga pabuto sa duha ka barangay sa dakbayan sa Lapu-Lapu sa miaging adlaw  nga Lunes.

Ang operasyon gipangulohan ni Police Chief Inspector Mark Gifter Sucalit, hepe sa Lapu-Lapu City Police Office sa miaging alas 3 sa hapon hangtud sa alas 6 sa gabii.

Ang mga illegal nga pabuto nga gisakmit mao ang mga piccolo, super whistle bomb, daluydoy ug yolanda nga nahimutang sulod sa napulo ka karton.

Nagkanayon si Senior Superintendent Armando Radoc, acting chief sa LCPO nga ang mga nakuha nga pabuto gikan sa Barangay Calawisan ug Babag apan walay nasikop nga mga manufacturer niini kay pulos nangikyas.

Mao na kini ang ikaduhang higayon nga adunay nakumpiskang illegal nga pabuto sa Barangay Babag.  Matud ni Radoc, walay mga lisensya ang namaligya sa mga nasakmit nga pabuto sa duha ka barangay.

Samtang sa Dakbayan sa Mandaue gironda sa kapolisan  ang mga naninda og pabuto diha sa karaang merkado publiko sa luyong bahin sa National Shrine of Saint Joseph sa Barangay Centro apan way nadakpan kay nag-iyahay pagpanagan ang mga tag-iya niini.

Gidili sa dakbayan ang pagpamaligya og bisan unsang matang sa pabuto.

Sa Lungsod sa Cordova, gipangsakmit sa kapolisan pinangulohan ni Senior Inspector Alexander Nuñez ang mga lantaka nga giduwaan sa mga bata lakip na ang mga pabuto nga gipamaligya diha sa merkado publiko.

Sama sa Mandaue City, way firecracker zone nga gitugot ang Cordova.

Ang hepe sa Police Community Relations (PCR) sa Cebu City Police Office nanawagan sa katawhan nga likayan ang paggamit og pabuto aron dili mawagtangan og kulamoy sa pagsugat sa Bag-ong Tuig.

Si Chief Insp. David Señor, hepe sa PCR sa CCPO nga nahinabi sa Banat News nagkanayon nga lisud na kaayo nga magmahay sa uwahi kun mabuthan na unya tungod sa pabuto.

Tambag ni Señor nga mas maayong mga torotot o bisan unsang matang sa butang nga magamit pagsaba-saba maoy gamiton pagsugat sa Bag-ong Tuig ug pagtan-aw sa fireworks displays aron dili madisgrasya.

“Mas maayo motan-aw na lang og mga fireworks display kay wala pa’y gasto kay sa magpabuto ka, delikado pa og mabuthan,” matud pa ni Señor.

Sa pagsugat sa Pasko duha ka tawo lang ang natala sa kapulisan nga naangol gumikan sa pabuto dinhi sa Sugbo ug sila naamong lang sa pagpabuto sa uban.

Apan si Señor nagkanayon,  kadtong mga tawo nga dili kapugngan nga magpabuto, angay nila kining himuon sa lugar nga dili makaamong sa uban.

Sa laing bahin, ang kapulisan sa Dakbayan sa Toledo nipatuman og hugot nga seguridad sa pantalan, bus terminal, malls ug simbahan  alang sa nagsingabot nga pagsugat sa Bag-ong Tuig. Matud ni Police Superintendent  Ali Baron  nga naka heightened alert sila  tungod sa pagdagsa sa mga tawo sa maong mga lugar.

Si Chief Supt. Manuel Gaerlan, direktor sa Police Regional Office-7 miingon nga angayan nga likayan sa pagpalit ang maong mga pabuto kay peligro kini sa tawo.

Matud niya magpadayon ang iyang kamandoan pagsakmit sa mga pabuto diha sa kadalanan ug gimandoan ang mga sakop nga magpatrolya aron sakmiton ang mga pabuto.

Si Renan Cimafranca pangulo sa Regional Epidemeology and Surveillance Unit, miingon nga mas maayo usab nga  likayan  ang pagpamunit og mga nikagar nga pabuto kini tungod kay nasayran nga daghan kaayo sa mga nabiktima sa mga pabuto sa nanglabay nga katuigan ang nabuthan sa pabuto nga wala makabuto sa unang pagdagkot.

Ang DOH ug RESU nipakatap na og mga posters nga maghatag og giya ug pahimangno sa dili maayong epekto sa paggamit og pabuto.

Gipaubos nang daan sa code white ang tanang pampublikong tambalanan aron makatabang kun adunay mga mabuthan.

Samtang ang Fire Marshal sa Dakbayan sa Sugbo, Chief Inspector Rogelio Bongabong niawhag usab sa katawhan nga kung mahimo sigurohon gayud ang mga loads sa linya sa kuryente nga ilang gigamit aron malikayan ang sunog.

Giawhag usab ni Bongabong, ang mga lokal nga opisyal ilabi na sa mga barangay nga magbutang gayud og fire cracker zones sa ilang mga dapit aron way magpataka og pabuto bisan asa.

Ang Cebu City Medical Center nga gipangulohan ni Atty. Rey Chris Panugaling, Chief of Hospital for Administration, nga nahinabi sa Banat News miingon nga siyento porsiyento na silang  andam sukad pa Disyembre 1. – Romeo Limpangog, Raymond Abarcas ug Jojo C. Ugdol ug Rowena Capistrano/EIM) (BANAT NEWS)