Anti-Rama streamers gitangtang

CEBU, Philippines – Gitangtang kagahapon sa Prevention, Restoration, Order, Beautification, Enhancement (PROBE) Team ang mga “illegal streamers” nga nahimutang sa tulo ka barangay sa Siyudad sa Sugbo nga nagsuporta sa 60 ka adlaw nga pagsuspenso kang Mayor Michael Rama.

Ang PROBE officer-in-charge, Raquel Arce, nagkanayon nga ang mao’ng lakang subay usab sa mando ni acting Mayor Edgardo Labella sa pagpatangtang sa mga lokal ug national nga mga political advertisements.

“What we removed were the illegal streamers those that also pose insult to the (suspended) mayor. Klaro kaayo nga pinabuhat kay same og font, text, color. All similar,” matud ni Arce kinsa nagtuo may kalambigitan kini sa usa ka ‘black propaganda’ ang pagbutang sa mga streamers.

Apan nagdumili si Arce sa pagsaysay sa ubang detalye sa isyu kabahin sa pamolitika ug nipasabot nga gawas na siya niini.

Nitug-an si Arce nga nakahibawo lang siya sa mao’ng isyu kagahapon sa sayo’ng buntag diha’ng nibasa siya sa pamantalaan.

Siya nimando sa iya’ng monitoring team sa pagsusi niini ug iya sab kini’ng gipa-dokumento.

Human sila nakahipos sa sakto’ng impormasyon, si Arce nipadala og team sa mga barangay diin gisab-it ang mga streamers sama sa dalan F. Ramos Extension sa Capitol Site; Doña Pepang Cemetery sa Tejero, ug Block 27 sa Mabolo. May gisab-it usab sa Labangon Barangay Hall apan matud ni Arce nga wala nila kini hilabti kay dili na sila gusto og gubot. Ang nabantayan ni Arce nga ang mao’ng mga barangay nga nagsab-it sa mga streamers mao ang mga apektado sa gipahigayon nga clearing operation.

Gawas sa mao’ng mga streamers, si Arce nibutyag nga wala na sila’y nakita nga lain pa nga mga political banners sa mga urbanized areas sa north, south ug central nga bahin sa dakbayan.

Dugang niya nga mosunod ang mga mountain barangays sa ila’ng inspeksyunon. – /GMR) (BANAT NEWS)