Nasunogan naglaum makabalik

CEBU, Philippines - Makabangon pagbalik sa trahedya nga ilang nasugatan, maoy pangindahay sa mga nasunogan sa Sitio Avocado, Barangay Lahug niadtong Sabado nga naatol sa kasaulogan sa ilang pista.

Matud pa ni Rey Relampagos, usa sa mga biktima nga wala gayud sila’y nabitbit tungod kay nag-iyahay na lang sila og panagan tungod sa kakalit sa panghitabo.

Panghinaut ni Relampagos nga makadawat sila og hinabang sama sa pagkaon, bisti ug uban pa tungod kay wala sila’y bisan usa ka pudyot nga nabitbit.  Malaumon usab si Relampagos kauban ang mga silingan niyang nabiktima sa sunog nga makabalik sila sa luna nga kanhi nila gitukoran tungod kay wala man sila’y lain nga kadangpan.

Ang maong luna iya sa University of the Philippines nga gidonar kaniadto sa Kapitolyo bugti nga tukoron kini og school buildings, apan naisyu kini kaniadto kay adunay plano ang lalawigan pagbakwi sa yuta kay wa man motuman ang UP sa kasabotan ug gipuy-an na man hinuon og mga tawo.

Base sa inisyal nga report, ang sunog gikatahong nagsugod sa balay ni Rosemarie Villarin kinsa miingon nga nabiyaan niya ang kandila tungod kay nagkutaw siya og gatas sa iyang apo.

Kagahapon sa buntag, gitigom ni Vice Mayor Edgardo Labella ang mga nasunogan aron masayran ang ilang mga gikinahanglan ug ang mga pamaagi nga aron sila makabalik sa ilang gipuy-an. Gibutyag usab ni Labella nga tukion usab karong adlawa sa special session sa City Council aron mapaubos ang lugar nga ubos sa state of calamity.

Samtang si OIC Barangay Captain Ging Ging Muaña, motigom usab sa iyang mga kauban sa Barangay aron makadeklarar og state of calamity, diin aduna pa hinuon sila’y pundo nga magamit.

Ang suspendidong si Mayor Michael Rama miduaw usab sa mga nasunogan kagahapon.

Base sa talaan sa Department of Social Welfare and Services adunay 81 ka panimalay ang naugdaw ug 187 ka pamilya ang apektado o 735 ka individual.

Gituohan ni Portia Basmayor sa DSWS nga posible pa nga mosaka ang gidaghanon niini samtang nagpadayon ang ilang pagpanglista. (BANAT NEWS)