Christmas Party sa kabataan
CEBU, Philippines – Kaliboan ka kabataan dinhi sa dakbayan sa Sugbo mitambong sa Grand Children’s Christmas Party nga didto gipahigayon sa dakong hawan sa Labangon Elementary School kagahapon.
Matud ni Nikki Isma Jimenez, focal person sa Cebu Progressive Uptown Movement, nga bisan pa man sa gidaghanon sa mga nisalmot sa kalihukan ug sa panagsa nga pagtutaligsik, wala kini makababag sa ilang Christmas Party.
Ang mga misalmot sa Christmas Party gipanghatagan og mga ginagmay’ng regalo nga nakapalipay sa kabataan. Si Rena Jean Baring, 10-anyos, taga Barangay Tejero mipadayag sa iyang kalipay tungod sa nadawat niya nga canned goods ug mga noodles. Nagpasalamat si Jimenez sa tanang nitabang, lakip sa mga sponsors sa maong kalihukan ilabi na ang Cebu City Volunteers ug ang mga sakop sa Cebu City Medical Center, nga didto aron pag-atiman kun may problema sa panglawas sa mga bata.
Si Dr. Elson Tudtud, sakop sa Cebu City Health Department, miingon nga walay dagkong problema nga panglawas sa kabataan nga misalmot sa kalihokan. Sa iyang bahin, si Annelyn Ricafort, usa ka inahan mipadayag sa iyang kalipay nga ang dakbayan nagpasiugda niining maong kalihokan.
Naglaom si Ricafort nga unta himoon kini pag-usab aron makahatag og kalipay sa mga bata, ilabi na ang mga bata nga kabus. Ang 10-anyos nga si Rena Jean Baring miingon nga karon pa siya nakasalmot niining maong kalihukan. – /RUB) (BANAT NEWS)
- Latest
