Budbod ug puto maya, paresan og sikwate

CEBU, Philippines – Nangamig ang kabugnaw sayo sa kaadlawon, apan bisan pa man niini naandan na sa mga relihiyoso nga Katoliko ang pagsimba sa Misa de Gallo nga molungtad og siyam ka kaadlawon.

Human sa pagtambong nila sa Santos nga Misa, maoy ilang puntareya ang mga painitan nga anaa naglinya duol sa mga simbahan diin nagpaabot kanila ang budbod ug puto-maya nga nindot kaayo paresan og sikwati, o kape.

Dili magpaiwit sa ilang pagkarelihiyoso ang mga Mandauehanon. Ato kining makita kay nagsugwak sa mga tawo nga nanimba ang National Shrine of Saint Joseph nga nahimutang sa Barangay Centro, ingon man ang mga simbahan sa pipila ka barangay.

Ang nag-ambahan nga nanimba sa Misa de Gallo, sagad naglakaw gikan sa tagsa-tagsa nila ka panimalay paingon sa simbahan. Sa ilang pagpauli, hapit gayud sa mga painitan.

Si Veneranda Tuñacao, 57-anyos nga taga Barangay Ibabao, Mandaue, miingon nga naandan na nila nga human sa ilang pagtambong sa Misa de Gallo mohapit gayud sila sa pagpamainit og puto-maya ug ilang paresan og sikwati.

“Kaniadtong dalaga pa ko,” ni Veneranda pa. “Kuyog nako ang akong mga amiga sa pagpanimba ug pagkahuman molipot mi sa luyo sa simbahan sa pagpamainit og puto-maya nga paresan og sikwati.’’

Dugang pa ni Veneranda nga bugnaw man ang kaadlawon nga pagtambong og Misa ug magpangita gyod ang iyang tiyan og init nga sikwati nga paresan og puto maya.

Ang merkado publiko sa Mandaue City kaniadto nahimutang luyo ra sa simbahan ni Saint Joseph ug sa maong merkado nagpahimutang ang mga painitan.

Karon, bisan og nabalhin na ang merkado publiko didto sa Sitio Tribunal sa Barangay Centro apan ang mga naninda og painit duol sa simbahan mipahimutang na lang og lamesa daplin sa karsada.

Anhi dinhi magtapok ang mga nanimba sa Misa de Gallo aron mainitan ang ilang tiyan sa dili pa sila mopauli sa tagsa-tagsa nila ka panimalay.

Sa kantidad nga P12 makapainit ka na kay ang budbod mapalit ra sa kantidad og P7 ang buok, ug P5 ang sikwati. Ang puto-maya tag P10 ang takus nga husto na kaayo nga makapabusog. – /RUB) (BANAT NEWS)