3 pushers sikop sa Pinamungajan

CEBU, Philippines – Nasikop sa kapolisan ang tulo ka lalaki sa managlahi’ng buy-bust operation sa Lungsod sa Pinamungajan kagahapong adlawa.

Nasikop ang usa ka gidudahang drug pusher pasado alas 12 sa niagi’ng tungang gabii sa Barangay Tutay.

Nagtingkagol na sa Pinamungajan Police Station detention cell si Jefferson Telleron kinsa nadakpan sa akto nga pagbaligya og shabu bali og P200 sa usa ka poseur-buyer.

Diha’ng siya nasikop nakuhaan og tulo ka pakete nga shabu, drug paraphernalia ug ang buy-bust money.

Nadakpan sab sa kapolisan ni Reil Francisco, 36, taga Barangay Pandacan, human nga gibaligyaan niya ang usa ka polis pasado alas 12 sa niagi’ng tunga’ng gabii sa Sitio Lamacan.

Nakuha gikan sa iya’ng posisyon ang tulo ka pakete nga shabu, drug paraphernalia ug buy-bust money.

Samtang sa laing buy-bust operation nasikop si Melbert Malinao, 30, gidudahang drug pusher, human kini gikataho nga nibaligya og shabu sa mga polis pasado alas 10 niadto’ng Sabado sa gabii sa samang barangay.

Si Malinao taga Barangay Punay sa sikbit nga Lungsod sa Aloguinsan apan modayo kini sa Pinamungajan kun duna siya’y katransaksiyon.

Apan wala’y swerte kay ang iya’ng gikasabot nga baligyaan polis man diay nga niresulta na hinuon sa iya’ng pagkasikop.

Ang suspek nakuhaan og lima ka pakete nga shabu, drug paraphernalia ug ang buy-bust money.

Ang tulo mag-atubang og kaso nga kalapasan sa Comprehensive Dangerous Drugs Act of 2002. – /GMR) (BANAT NEWS)