Youth Ministry Awareness Week gitak-opan

CEBU, Philippines – Pormal nga gitak-opan kagahapong adlawa ang Youth Ministry Awareness Week nga gisaulog sa tibuok simbahan sa Archdiocese of Cebu dungan sa ikaupat nga adlaw sa Misa de Gallo nga pagpangandam usab pagsugat sa Pasko.

Sa Archdiocesan Shrine of San Roque Mambaling usa ka boodle fight ang gihimo sa mga batan-on human sa misa nga gihimo ni Fr. Roberto M. Ebisa, General Manager sa DYRF ug Power FM. Tipik sa wali ni Ebisa mao ang pagpahugot sa pagtuo ug kanunay nga pagsalig sa Ginoo bisan pa man sa unsang unos nga moabot sa kinabuhi tungod kay moabot ra gayud ang tukmang panahon sa matag usa.

Gipadayag ni Ebisa, nga niining panaw sa kinabuhi sa usa ka tawo kinahanglan gayud ang kanunay nga pag-ampo  ngadto sa Kahitas-an.

Gawas sa boodle fight, tanang mga manimbahay ang nakaambit sa libreng painit nga giandam matag kaadlawon sa kura paroko Reverend Fr. Miguelito "Pads Do" Sarmago kauban ang mga opisyal sa matag kapilya.

Samtang sa laing bahin 300 kapin ka mga kabataan sa Barangay Kamagayan ang nakadawat og libreng pinaskohan sa mga grupo nga nagpakabana sa kabus nga gipangulohan ni Fr. Heinz Kuloke, SVD.

Matud pa ni Fr. Lucas Ajawona, SVD tanang mga lugar nga adunay daghan mga bata ug kabus mao gayud ilang adtuon aron hatdan sa mga grasya para makatagamtam og kalipay ang katawhan.

Sumala pa ni Ajawona, una nilang giduaw ang mga nanimuyo sa Inayawan Sanitary Landfill diin nag-apod apod sila og mga pinaskohan ug gisunod nila ang Kamagayan ug bisitahon pa usab nila ang mga basurahan sa Umapad, Mandaue ug mga tawo nga naa nanimuyo sa kadalanan.

Gibutyag ni Ajawona ang maong kalihukan gimugna ni Fr. Kuloke ug Brother Paul Bongcaras sa dihang pipila katuig ang nakalabay sa ilang pagsuroy-suroy sa Sugbo daghan silang nakit-an nga kinahanglang tabangan.  (BANAT NEWS)