Mga tinun-an hatagan og tag P1,000

CEBU, Philippines – Adunay sugyot nga ang matag tinun-an sa mga public elementary ug high schools dinhi sa dakbayan pahatagan og tag P1,000 nga allowance kada enrolment.

Kini aron magamit nila isip dugang bayad sa ilang uniporme, school supplies ug ubang gastohan sa ilang pagtungha.

Nauyonan sa Federation of Parents Teachers Community Associations (PTA) nga awhagon ang City Council ug ang Cebu City School Board nga suportahan ang ilang tinguha.

Wala makahimo’g sugyot ang PTA Federation kun asa magkuha og budget ang dakbayan aron gastohon sa paghatag niining nahuna-hunaan nila nga allowance sa mga tinun-an.

Ang mga local government units adunay Special Education Fund (SEF) nga katumbas sa “one percent” sa makolekta nga real property tax apan ang balaod naglatid na daan kun unsay gastohan sa SEF.

Base sa lagda nga gilatid sa Local Government Code wala masukip nga ang SEF gastohon sa paghatag og allowance sa mga bata.

Si Konsehal Alvin Dizon nga maoy chairman sa Committee on Education sa City Council misuporta niining maong lakang.  (BANAT NEWS)