12T ka botante sa Mandaue dili makabotar

CEBU, Philippines – Kapin sa 12 mil ka botante nga narehistro sa dakbayan sa Mandaue ang dili na makabotar sa eleksyon karong sunod tuig kay wala sila makapakuha og biometric.

Gitug-an kini ni Atty. Fleur Ann Gujilde, ang election officer sa Commission on Elections (Comelec), sa dakbayan sa Mandaue.

Matud ni Gujilde nga gibasura na sa Korte Suprema ang petisyon sa mga tawo nga wala makapakuha og biometrics ug nag-awhag nga tugotan sila nga makabotar.

Ang kadagkoan sa Comelec mitataw nga ang “No Bio, No Boto” policy angayan gyud nga ipadayon aron nga maalkontrahan nila ang mga flying voters atol sa adlaw sa election.

Si Gujilde miingon nga sa Mandaue kapin lang sa 189 mil ka botante ang matugotang makabotar sa 2016 election kay sila ra ang nakapakuha og biometrics sa ilang election records.

Kun ang usa ka botante aduna nay biometrics makita na ang iyang hulagway, fingerprint ug pirma, ingon man uban pa nga inpormasyon diha sa iyang Comelec records.

Sa Book of Voters makita na ang hulagway sa botante ug makapasayon kini sa mga sakop sa Board of Election Tellers sa pag-ila kun ang mibotar mao ba gyud ang tinuod nga botante.

Sagad atol sa eleksyon nga adunay mangreklamo nga inig-adto nila sa ilang mga presinto may mga tawo na nga mibotar gamit ang ilang mga ngalan.

Atol sa kapin sa tuig nga continuing registration ug sa pagpa-biometric, ang 6,000 lang sa kapin sa 18 mil nga walay biometrics ang misanong sa awhag sa Comelec.  (BANAT NEWS)