Sinkholes gibantayan

CEBU, Philippines – Ang hepe sa Provincial Disaster Risk Reduction and Management Office (PDRRMO) mipahimangno sa posibleng manggawas nga mga sink holes tungod niining pagsige og uwan ilabi na sa pagsulod na sa bagyong Onyok nga mitadlas sa Kabisay-an.

Si Baltazar Tribunalo mibutyag nga gi-monitor nila karon ang mga lugar sa habagatan tungod kay dinhang dapit adunay daghang sink holes nga nanggawas sama sa mga lungsod sa Badian, Argao, Alcantara, Moalboal, Barili ug Dumanjug.

Matud ni Tribunalo nga kung dunay mga sink hole nga migawas human sa bagyong Senyang aduna gyu’y posibilidad nga niining pagsige og uwan duna pay mga sink hole ang manggawas.

Samtang sa Mandaue City, gipahimangnoan ang mga lumolupyo nga magbantay sa mga pagbaha o pagdahili sa yuta  tungod sa pagbunok sa kusog nga ulan.

Si Felix Suico nga maoy CDRRMC officer sa maong dakbayan miawhag sa mga opisyal sa barangay pag-monitor sa tagsa-tagsa nila ka mga lugar. Si Engineer Oscar Tabada sa Pagasa Region 7 miingon nga ang bagyong Onyok magdala og daghang uwan sa Central Visayas.

Si Roger Paller, Public Information Officer (PIO) sa dakbayan miingon nga giandam nila ang matag clustered barangay alang sa mas dinaliang organisado ug dinaliang pagresponde.

Tungod sa bagyong Onyok nga nisunod  nahilis ra nga bagyong Nona,  gibutang sa Public storm warning signal no. 1 ang 20 ka lugar sa Mindanao.

Apan base sa weather forecast sa Pagasa sa alas-5 kagahapon sa hapon posibleng mohinay kini ini og tugpa sa yuta ug mahimo nalang usa ka low pressure area(LPA).

Samtang gikondenar sa National Disaster Risk Reduction and Management Council (NDRRMC) ug sa Armed Forces of the Philippines ang pag-ambush sa New Peoples Army sa relief convoy nga nagdala og hinabang sa mga biktima sa bagyong Nona sa Eastern Samar.

Base sa report sa Philstar.Com, ang 546th Engineering Battalion ug 83rd Reconnaissance Company kauban ang mga sakop sa DSWD luwan sa convoy nga gilangkoban og M35 truck, usa ka civilian nga truck ug usa ka mini-dumptruck aron unta maghatud og hinabang sa Pinabacdao, Samar dihang gibanhigan kini sa mga NPA kagahapon sa buntag.

Duha ka sundalo ang naangol sa maong   hitabo. Ang maong ambush gibuhat sa NPA tulo ka adlaw human ang Communist Party of the Philippines mipahibalo nga modeklarar sila og ceasefire sugod Disyembre 23 hangtud sa Enero 3 sa sunod tuig. (Brenda Batuto ug Romeo T. Limpangog/EIM)(BANAT NEWS)